Govoridu mi u selo nako onega ča se je jedan kamijoncin šta je vozija drva zaglavija kolon u Tunbin jerbo se u Tunbinu otvorila rupa,a sriča da rupa nije bila toliko velika,pa je samo sa kolon zaglavija i kako mi je ovi jedan reka,jerbo je bija sa“ druge strane žice“tražilo se pomoč da ga se dođe sa sajelon izvuč,ali se ipak uspija nikako sam iz otega iskobeljat…

Pa me od utorka,od kako se to dogodilo u selo fermajedu da kako do sad ništa oba tomen nisan pisa,e da san ka vidoviti Milan,e da san Vava,e Nastradamuse,vičedu za menon,očeš sad likovat sa onon tvojon poznaton,a jesan li Van ja reka ča če se dogodit itd.itd.,neka i jemaš prav likovat,pokaza si jin da ne činidu posal kako triba,a lipo si jin reka ča se more dogodit,a jesu li najpri naplatili ča su na ovo misto nikidan asvalat mekli,pa če sad opet ovi popravak naplatit, je li u selo triba koko poginit pa da se nike stvari počnedu rješavat,oče za ovo sad koko odgovarat ča nije na vrime sanirano nego se čekalo da propade,a ko je sad od oni ča su na odgovorna mista kriv,niko,najbolje da sad ispadne kriv oni koji je tote proša,on je rupu otvorija…, asti koja žeščina,pa ja ispadan ka kamilica prema komentatoriman iz našega sela koji na svakomen kantunu raspravljadu oba ovemu događaju.

Odma da na početku rečen,stoji ona rečenica,“A jesan li van ja reka šta če se dogodit“,a da mi je drago i da ču ja sad likovat zbog toga,ne,nije mi drago i neču likovat,jer da san to mislija onda nebi ono nikidan kad san govorija-pisa o ovemu problemu upozorija da se prije asvaltiranja ondašnjega ulegnuča pogleda razlog zašto je do toga ulegnuča došlo,je li ispod njega upravo ono šta je i bilo,raspucana taraca od Tunbina i da je moguče upravo ovo šta se je i dogodilo,propadanje u Tunbin,e pa pošto san o tomen pisa onda mi se nikako ne more govorit da likujem.Da san tija likovat onda bi bija muča i čeka iza kantuna kad če se dogodit.

Ne,nikako ne mogu likovat i šta je najgore od svega,niko od nas nezna,baš šta se Tunbina tiče,koje su sljedeče posljedice koje se tu moredu dogodit,a došavši do određeni, pa sad neka budedu i čulareklakazala informacije,pri dvi godine smo mi iz opozicije oti problem ča se tiče stanja Tunbina koje je po toj informaciji,dijal kanala u kaotičnomen stanju,iznili na sjednici Mjesnoga Odbora za da bi iz Grada dobili odgovor kako situacije nije ni blizu toj šta smo je mi iznili.

Neman pojma kako su oni došli do toga da je Tunbin u dobromen stanju,ali me nakon ovoga, kad su previdili ovu situaciju ča se Tunbina tiče, na ovomen mistu,sad vata još veči straj šta je moguče da bi se moglo dogodit cesti na potezu od štrike do Gospice,po kojoj zanji dvadesetak godin po tomen Tunbinu idedu teški kamijoni i od četrdesetak toon,a svi znamo da su još onda,kad je tunbin bija „mlad i zelen“ komuništi mekli znak da se navr njega more odit promjetaliman koja nisu teža od pet ton i toga se pridržavalo,jerbo bi se za prikršitelje pisale kazne,a danas toga nima,neka i dalje stoji ista tonaža,a ča niko misli da su komuništi bili ludi,pa se sad naša niko pametan i dopušta ovakvi prometni nered,e i sad zamislite,ča se od onda kad se oti Tunbin napravija,pa do dana današnjega ispod asvalta dogodilo i ča je moguče da se u budučnosti zbog toga opet,ka ovo nikidan dogodi,jer kad se to dogodilo doli u selo di ne gredu otaka teška promijetala,a onda sad neka svak za se razmisli šta se more dogodit na dionici o kojoj san sad pisa,a pošto smo evo skoro pa tri godine po pitanju teškoga prometa u našemu selu na Mjesnomen Odboru govorili u vitar,bilo bi dobro da nova predsjednica Mjesnoga Odbora ovi problem svati vrlo ozbiljno,jer kako smo mogli vidit,nesriča na Tunbinu nije samo neko tamo bezvezno naklapanje,več nešto šta svaki čas more prič u zbilju i to sa tragičniman posljedican.

Evo rupe koja se otvorila:

Kameni zid u Tunbinu koji je sa obe strane je dijal mosta koji je tote bija dok Tunbin nije bija natkriven,več je to bilo obično korito,a koji je služija za prilaz sa jednoga na drugi dijal mista.

A evo ča san ja o tomen bija pisa

Naslov:A kad če koko od oni ča tribadu detektirat probleme ovo vidit??
Postavio:adminDatum:July 20, 2021 11:20 pm

Jema več niko vrime kako pratin ovo misto kako pomalo ali sigurno sve više i više tone,a površina je sve veča i svaki put mislin meknit če bar čako znaka,ma ništa,ali nema veze,ispod je samo tunbin i ča se more dogodit,a ono ča se več par metri od ovega mista prema uzgor več dogodilo,a to je da je jedan stojadin potonija u tunbin.
E sad oče li se ovo na vrime sanirat (ne samo bacit asvalat,več vidit i kako stoji betonska konstrukcija ispod njega)ili če se čekat da koko sa auton upadne u tunbin,pa če onda?

Naravno,to če bit kako nije jema sporske sriče,naša se u krivo vrime na krivomen mistu,a možda bude jemat sriče da ovo bude čipo uz rub od tunbina,a ne sredina…

Naslov:Evo je zakrpilo
Postavio:adminDatum:July 22, 2021 9:50 am

Prisinoč san pisa o onemu problemu sa ulegnučen asvalta ča jema več dugo vrimena,a dosad niko nije reagira i eto,reagirali su,jučera je meklo asvalat i ulegnuče zakrpilo.
A šta je ispod ovoga,a je li dosta samo asvalat meknit?
Ka ča san pisa,par metri uzgor čovik je sa auton uletija u Tunbin,jer se isto tako rupa otvorila,a sad,koliko je ovo misto siguro,neznan,ali se nadan kako čedu ovu situaciju pratit i ako se i dalje nastavi sa ulegnučen asvalta,da se izbjegne možebitna tragedija,odgovorni promtno reagirat.