A ne triba ovde u nas bit nikakvi vištac,prorok,gledat u razne kristalne ili koje druge balote…
Samo triba pratit kako to ide i vrlo brzo uđete u šemu kako se to ovde u selo radi,pogotovo kad ja o tomen napišen.
Zna se kako se nešto ne sad,kad ja to napišen triba učinit,več se odavno tribalo,pa onda pustin malo vrimena da to učinidu,a naravno to se u to vrime ne napravi,a onda napišen da se to triba učinit i onda kad napišen ritko kad če se odma napravit,iako bi tribalo,ali bi onda bilo kako trčedu za menon i radidu ono u što ja upren prston,a to za nji baš nije dobro.

Bilo je oni koji su mi govorili kako biče oni koji bi oto triba vidit,ne vidi da san napisa,dobro je ne vididu da san napisa,ali ako niki problem postoji več niko vrime,zašto ja uopče triban oba tomen pisat,zar nimadu određene službe koje su zadužene da tako ništo detektiradu,prosljedidu i oni koji triba oti problem riješi?
A to ča se misli kako niko od oni ča bi triba ne čita,a sitite se samo kad san pisa o tomen da mi je Gradonačelnik reka da če me za sljedeču napisanu laž tužit,a kad je to reka,osin mene je tu još bilo nekoliko nas iz Mjesnoga Odbora i još neki iz Grada,a ja mu nato reka,da neka ne čeka sljedeču laž,več da me za sve laži do tada napisane,tuži, isto tako sičate se kad me je glasnogovornica iz Grada nazvala kad san 2018 godine pisa o tomen kako gradske strukture na godišnjicu bonbardiranja nisu mekle buket isprid staroga kanpanela i počela objašnjavat kako je to bilo tako i tako…?

Znači da ipak pročitadu,ako ništa,bar čekadu moju sljedeču laž za koju če me tužit.
Ali sad,ako se čeka moja laž,onda se sigurno pošalje koga za vidit,je li ono ča san napisa istinito ili nije i sad ono najzanimljivije,kad se vidi da je,zašto se to onda ne sredi?

Ma neču više oba tomen,jerbo bi me daleko odvelo,uglavnon san oba ovemu kako bi tribalo na Gojaču di se ljudi sunčadu posut malo žala,pisa lani u sedmi misec i naravno,nisu došli to napravit i naravno u tomen san textu spomenija kako bi to mogli dogodine učinit i to su evo danas učinili,ali da ja puno sad ne pišen,pročitajte text koji san oba tomen lani u sedmi misec napisa:

Tribalo bi na Gojaču posut malo žala
Postavio:adminDatum:July 9, 2020 11:50 pm

E a sad da koko krivo ne svati,to je ono vanka di se mekne šugaman za leč,žalo je sa toga mista skroz nestalo.

Prolazin danas Gojačon i jedna žena ča se tote kupala mi govori da je li mi more ništo reč,da je li more,govorin ja,pa mi pokažije na misto di je predviđeno za ležat na žalu i govori kako jema več dvi-tri godine da niko nije niti karijolu žala tote iskrenija,a kako zimi budedu valovi,jednostavno ga je odnilo,a ova druga ča je bila do nje govori,ma ča dvi-tri godine,jema cili deset godin da se ništa od žala ovde nije prosulo,a do te računice je došla kad je zbrojila koliko joj je dite jemalo godin kad su to zanji put činili.

A dobro,eto ču ja napisat i sigurno čedu oni kad oto vididu,ako ne sutra,a onda sigurno prikosutra doč tote žalo itnit.Je,je.

A i ako to ne učinidu,reču ja na Mjesnomen Odboru,ali kad bude,ni to nije priša,valjda čedu ga do Nove Godine sazvat,pa se možda otemu žalu moremo dogodine nadat?Nije priša,kad smo mogli ovoliko čekat,onda se moremo još pinkicu strpit.

Samo mi ništo nije jasno,nikidan su baš tote bili radovi  i mali bager je bija, mislin da su prisađivali nike tamarine,ma zanimljivo kako niko od oti ča su zaduženi za plaže nije vidija da tote triba,ne puno,ne triba u nas ka u Donja Kaštila,na šlepere žala po plažan iskričat,eto,ovde  bi ljudi bili zadovoljni i sa jednin kamijoncinon žala,samo da jin kad legnedu, doli nije tvrdo.

A jutros su tu napokon posuli žalo:

I sad to izgleda evo ovako:

PS-ono jučera kad san pisa da na Sokolanu triba stavit priobučivalicu,to nečedu moč puno prolongirat,jerbo vrime je od kupanja i jednostavno je moradu stavit.