Odma na početku,ono ča san jučera napisa da smo mi ka oporba prema presjedniku Mjesnoga Odbora išli sa zahtjevon za hitnon sjednicon zbog situacije oko računi od Zelenoga i Modroga,dobili smo odgovor da če se sastanak održat u ponediljak,pa ko ča jema,kad me vidi u selo neka mi reče.

Jučera ja na Rivu,a oni me odma otpremili prema biloj zgradi,a ča je sad,ajde tamo isprid kancelarije od Zelenoga i Modroga je, ka da je opsadno stanje,ovi jedan je iša tamo sa računon i govori da ji je naša deset isprid sebe,okrenija se i iša ča,a ono ča san ja tote bija cilo vrime su dolazili novi ljudi,ne moreš nikako falit di gre,večina nji jema oto računa o smeča u rukan i dokle ono grintavo gredu mašedu sa njin ka sa štafeton i vidiš ji kako najpri ulazidu u opčinu,a za dvadesetak sekundi izlazidu ništo mrmljajuči i gredu prema staroj Kemijskoj školi di se trenutno nalazi kancelarija od Zelenoga i Modroga.

A tote opet isprid oti vrat,dokle čekaš i čuješ ča ko jema za reč,a fala Bogu jema,moga bi lipi jedan roman učinit,samo se sad mislin bili bija tragični prožet sa komedijon,oli komični prožet sa tragedijon,a dokle ja razmišljan o toj tragikomediji izlazi nika žena iz našega sela,naravno,cila grintava,priča o nikiman kolpiman,spominje nečijega tatu i mamu,a ja je pitan,a ča je,ma ča ča je,neka sve ide u pi…,bip-biiiip,a šta oni mislidu da san ja budala,a ča Van je to unutra reklo pa ste tako dobre volje,a da moran platit,a jeste li Vi pismeno ostavili oto na šta ste se žalili,pitan ja nju,a nisan,e tote falijete,Vi ste sad bili unutra,ovomen ča je unutra gre radno vrime,on Vas je lipo primija,reka svoje,Vi ste izašli i ko zna da ste sad tote bili i na ništo se žalili,niko,lipo ajdete doma i sve ono šta Van nije jasno lipo napišite na komad karte,učinite duplikat,odnesite jin u kancelariju,neka na oni Vaš primjerak ča čete ga odnit doma udredu protokolarni broj i to je to,a lipo i na računu piše da se morete žalit u roku od osan daan,karta kanta,rekli bi stari ljudi.

A kad smo več kod toga ča na računu piše,a ka i na svakomen i na ovomen jin je glavno napisat da če ako ga ne podmirite,oni onda učinit ovrhu,pa jadan svit da mu ono mižerje ča prima nebi blokiralo,o straja trče platit,a onda bi se usput nadoveza i na ono ča san nikidan pročita ča je direktor od Zelenoga i Modroga Alen Lučić izjavija,a to da korisnik javne usluge (u ovomen slučaju odvoza smeča) pod materijalnon i kaznenon odgovornošču sa svojin potpison garantira za točnost podatak koje je naveja.

E pa šjor Lučić,ovo opet svačan ka strašenje ljudi,a onda bi usput upita,a ča je sa onin Vašin potpison na svakomen računu ča su ga korisnici na svoje kučne adrese dobili??

A je li i Vi isto tako pod kaznenon i materijalnon odgovornošču sa svojin potpison garantirate za ispravnost svakoga toga računa na kojemu se Vaš potpis nalazi?

A o čemu se radi,a o tomen da je jučera na Rivu di nas je bilo desetak, jedan izvadija najpri oni upitnik di mu je poslano da jema tri člana,a on je sam,pa je iša u Vašu kancelariju za oto ispravit i onda mu je to ispravljeno i napisano (članova-1),a onda iz žepa vadi i račun od Zelenoga i Modroga di mu piše broj članova-2 sloviman(dva),a sad Vi meni recite kako su to početničke greške ili falija je konpjuter ili čako treče,ali ovde se radi o totalnoj aljkavosti ili nesposobnosti nekoga da točno prepiše podatke,ali naravno,opet se vračamo tamo nigdi na početak priče,oti niko ča je falija,lipo stoji u svojoj kancelarijici u koju če, ovi ča mu je falilo u račun upisat,opet morat dolazit,čekat u redu i opet ponavljat isto,iako je to sve več napravija.

A evo ovde doli morete vidit oto o čemu san pisa,da ne ispadne da san izmislija:

Znači ovo je oni akentni list ili kako li se več zove, di se vidi da ovome piše jedan (1) član

A ovde doli morete vidit da je ota ista osoba dobila račun na kojemu mu pišedu dvi osobe: