Je da puše bura pa prašine jema na sve bande,ma ova prašina se digla zbog onoga dila ceste između štrike i vatrogasac koji je u radoviman jema jednu četiri pet miseci i napokon ima naznak da bi moglo to sve doč kraju,ali ča se sad događa?a to da jema bit po onemu kako su bacali beton ispada da se ovi dijal ceste neče u konpletu asvaltirat,nego samo na peci bokune, tamo di se kopalo,e pa se sad zove na sve bande,razgovara se sa ovin i onin za vidit ča se tot ustvari događa i oče li stvarno to bit ka ča jema bit da bi tako moglo bit i ča učinit da tako ne bude? a jutros kako san to iša slikat upa san u priču sa jednin pa ja njemu ka govorin ma biče če oni ovo siguro sve asvaltirat,a ovi če meni neče,neče,a kako ti znaš da neče,a po ovomen kako su mekli šahte stojidu taman u razini sa starin asvalton,iako,nastavija on dalje govorit,vako kako gledan na oko paridu mi se ka da nike malo i odskačedu,nike prema unutra,a nike vanka e, i onda po ovomen kako sad stvari stojidu tribali bi razbit cili ovi stari asvalat da bi mekli novi,a ako čedu to učinit zašto su onda ovo između betonirali?… I tako bi on bija do sutra meni nabraja,a ja njemu govorin,ma znaš ča,vidičemo,ne virujen ja baš da če to tako bit,a možda i oče,a naravno,kad sve bude gotovo bit čemo pametniji.Je,je govori meni ovi,ma željezo se kuje dokle je vruče.

Ma inače ovo meni okolo ovi pusti radov ča se okolo po cestan kopadu ništo nije jasno.U večini slučajev posli toga obavljenoga posla asvalat nakon nikoga vrimena ulegne,ili odma u startu bude nadignut,svidoci smo kad se renovirala cesta i asvaltirala dionica od škole prema jugovinilu kako je odma u startu to ostalo valovito,a nanosija se konplet novi asvalat,pa onda šahte budedu ili više od asvalta ili niže od asvalta… i to niko nakon obavljeni radov ne kontrolira? A priča meni čovik ča je u Njemačkoj radija na baušteli i to baš na vakviman radoviman ča se tiču kopanja cete,postavljanja šahti… da bi jin iz toga grada di bi radili uvik nad vraton visija niki nadzorni od strane grada i dok on ne reče dobro je nema odit ča, siča se jedan put da su dionicu od jednu dvadesetak metri tri puta iznova radili jer jin je ovi uvik nalazija da ništo nije bilo kako triba učinjeno.