Pri jednu dvadesetak daan i zanji oni gvozdeni kontejner za smeče je maklo ča,sada jemamo kante,a za one ča kante ne moredu jemat,meklo je one zelene kontejnere sa katanciman u koje moredu itat samo oni čije ulice na otiman kontejneriman pišedu,ali ča se događa,a upravo ono ča se znalo da če se dogodit,a to je da iako su svi dobili ili kante ili ključe za kontejnere,smeča jema svugdi okolo na mista di nebi tribalo bit.

Kako je uz ove zelene kontejnere za smeče meklo i one za kartu,plastiku i caklo,oni ča su dobili kante, svoje smeče su nastavili i dalje itat u kontejnere,neka oni gvozdeni kontejneri više nima,oni ka “staza slonov” i dalje nosidu smeče na misto ka i prije,pa neka tamo više nima kontejneri ili na mista di su oni zaključani kontejneri,ali to nji ne briga,oni jednostavno svoje smeče tribadu ostavit,pa sad to bija oni kontejner za plastiku oli kartu,nije bitno,najvažnije je da se on smeča riješija.

Tako je jedan nikidan iz porta paka izvadija smeče i kako su ovi zeleni kontejneri bili zaključani on se odlučija itnit ga u oni za plastiku,a pa smo ga pitali,a je li,a oli ne vidiš da je to kontejner za plastiku,a oli nimaš doma kantu za smeče bacat,ma pusti kantu,koja kanta,di če on sad sa smečen,prije je baca tamo u kontejnere isprid crikve,pa su ji makli,ovi zeleni su zaključani,a di če on smeče sad bacit,a mi opet, jemaš svoju kantu pa bacaj u nju,ma koja kanta,oče svakako smeče u kontejner od plastike itnit,ali je ipak odo toga nauma odusta,smeče vratija nazad u auto i iša ča,pa je tako niki drugi dan jedna žena isto tako vidila da je se oni jedan od kontejneri karta-plastika more otvorit i izvadila je vriču iz porta paka,ali kad je vidila nas i kako je fotoaparat spreman ovjekovječit oti momenat, bržebolje je otu vriču vratila nazad u autu i išla ča.

Inače,napokon je nakon biče i više od godinu daan vratilo nazad one kontejnere za plastiku,kartu i caklo itat,ali,di je kontejner za tetrapake,bitno je da su po sviman mistiman održane poduke o razvrstavanju otpada,a međuostalin je predavač govorija i o tetrapaciman ka vridnomen resursu koji se more i okolo pet puti iskoristit,a iako je takvi kontejner sve do nikidan bija isprid crikve,sad sa novin ustrojen, otakvoga kontejnera za itat tetrapake više nima,bitno je da su se potrošili pinezi za nas po Kaštilima educirat.