Danas je u naše selo do onega maloga jaja ča ga je nakon dugo vrimena lani meklo,a to ponovilo opet ove godine,meklo još jedno,veliko,moderno,friško opiturano,jaje(još vonja po laku),a došlo je direkt iz Hrvaskoga Zagorja di ga je oslikala jedna umjetnica. E i na tomen jaju su nacrtana razna obilježja našega sela,a kako su ovi ča su ga mečali išli ča,tako su se okolo otega jaja cili dan izmjenjivale razno razne „komisije“,snimilo ga je iz svi kutev,ništa nije moglo promaknit,pa je onda bilo da ono anđela na slici pari ka da sidi na kontejneru,a usput je dodalo kako prati je li se po propisu reciklira(odvaja otpad),a bilo je i čuđenja,ča jemadu ove dvi biste na jaju bit,a jedan se malo detaljnije zagleda pa je vidija kako je fra Bernardinu nacrtalo brkove i odma se okrenilo prema bisti,a pa on nema brkove,a onda je jedan doda,asti,pari vako sa brciman ka Stjepan Radić…

To je bilo okolo jedanajst ipo,a onda san iša povirit i okolo dvi ure,u tu uru na Rivi bude sasvin jedna drugačija struktura ljudi,e i nisan ni doša,odma me zvalo na raport,mali vamo dođi,ča je sad,pitan ja,a reci ti nan,je li,a zašto ste vi iz mjesnoga odbora biste mekli na jaje,a ma ko je nas pita,to van se sve u hadezeju radi,niti je ko nan reka da se jaje čini,da če se jaje meknit,a kamoli da smo raspravljali oba tomen ča če na tomen jaju bit, slušaj mali,koje biste,ako ikoji spomenik zaslužuje na ovemu jajetu bit,onda je to spomenik neviniman žrtvan poginulima u bonbardiranju našega sela…
I još je on tote puno toga reka,a ovi do njega isto tako dodali i to je bilo pametni besid,ma zaludu je šta Vi govorite,kad jemamo mi „one“ ča mislidu zamisto nas…

A onda malo dalje opet rasprava o jaju,pa opet mene pitadu,a da zašto na jaju nima Trpimirove darovnice,a drugi je doda,a neš ti,ka da je ona bitna,govori ovi do njega,a kako nije bitna,pita ga ovi prvi,a onda mu ovi drugi odgovara,je li je meklo,nije,znači da ota darovnica za našu povijest uopče nije značajna,biste su značajne…
A onda san zbog otega jaja opet i uvečer u selo saša,sad san se uvatija u priču sa nekiman trečiman di su se isto tako čudili šta biste jemadu tote tražit i na to se dodalo,a zašto onda na jaje nije meklo i facu osobe koji je zaslužan da se Sučurac počeja gradit,Andriju Benzija je tribalo na jaje meknit,a jedan je doda,a oli top na Glavici ne mirita jemat svoje misto na jaju,koliko to kroza Kaštila jema vaki topi,nijedan,a mi Sučurani smo ji od Turak obranili…

Eto,to je zasad to,jaje se i dalje sa svi stran,danonočno,uz pomoč očali i povečali pažljivo promatra tako da bi moglo bit još zanimljivosti.
A sad,evo Van doli slike sa svi kutev od otega jaja,pa možda i Vi nađete čako zanimljivo: