Nisu naši stari bili ludi pa se na ovo podneblje stolječiman sadila loza, maslina i smokva jerbo kad liti upeče zvizdan u poje ništa drugo do ovoga nabrojenoga ne more priživit. Ali ova godina je bila ništo posebno,jerbo je u cilo lito palo toliko kiše da je namirila prosjek sve do kraja godine tako da su smokve od velike vodurine gnjijale i ni četvrtina se nji nije ubrala,a ni osušila nego ča je to uobičajeni prosjek,masline su skroz desetkovane,(reka je ovi jedan da ji je on obra sa trakotron,a kako pita ga drugi,a lipo sve su bile doli na podu), a ni sa grožđen nije bajno,jer je na puno misti počelo gnjijat tako da je kod pojedini prinos u odnosu na npr.lani skoro i za polovicu manji.
Evo ovi vinograd ča ga vidite na slikan je dobro proša,nima baš puno gnjileži,a i gradacija (18) je s obziron na to kakvo je bilo vrime odlična, jerbo je bilomen muškatu početkon devetoga miseca kad se triba brat za jist slador bija jedanajst,a onda kad je izgubija na ljutini i bija za jist devedeset posto ga je propalo. Ne ponovilo se.