Prošlu sedmicu počeli su radit oni novi semafori ča ji je meklo kraj osnovne škole,a kako su počeli radit,tako su počele i priče,na kojemu principu radidi,a naravno,ka i kod svega drugoga,ni ovde baš nima koncenzusa kako i na koji način oto semafora radi,pa ču ja evo u kratke crte to provat objasnit.

Jednu,tamo, malo više od stotinjak metri prema zapadu od ovi semafori nalazi se radar sa ekranon koji pokazije kojon brzinon vozite,pa tako ako vozite manje od pedeset kilometri,koliko je na toj dionici i dozvoljeno, onda van se brojevi prikazijedu u zelenoj koluri,a čin koji kilometar priđete pedeset,onda van brojeve ispiše u crvenoj koluri,a ispod nji napiše da usporite,a za one ča volidu pritisnit po gasu i na toj dionici vozidu malo više,ka i puno više od šezdeset kilometri na sat, onda oti brojevi počmedu lanpat,a ispod nji napiše,palim crveno,tako da otega,kad dođe do oti novi semafori čeka crveno svitlo,da se more malo oladit.

Za one ča ji brka kako jin oto semafora kad oni dođedu isprid njega upali crveno svitlo,neka su vozili nigdi okolo četrdesetak kilometri,objašnjenje je kako oni radar ča na njemu pišedu brojke i slova več na stotinjak metri prije počme vatat brzinu od određene aute i odma reagira prema semaforu,pa se tako dogodi da i oni ča su sporo vozili,a blizu su semafora,zbog otega ča je brzo vozija,na semaforu moradu stat. Eto.

Pa če van tako na oviman slikaman parit da ote aute vozidu ka ča pišedu brojevi na ekranu,ali nije,oto radar vata one ča su osandesetak do sto metri dalje od nji.

Naravno, u raspravama se more čut i pitanja poput,a zašto oti isti radar nije meklo tamo i na istočnu stranu,jerbo vatajuči zeleno svitlo na semaforu,pogotovo kad počme žmirkat,ne tako mali broj vozači lipo pritisne gas i proleti oton dionicom.