Od kako su jutros u osan uri otvorene bokete,pa do prodane zadnje karte prošlo je manje od dvi ure vrimena,inače su se karte do danas prodavale za pretplatnike,a danas je okolo petnajst iljad ulaznic krenilo u slobodnu prodaju,s tin da su se mogle kupit iz naslonjača-oneline ili fizički-stat u redoviman,koji su se mirili u stotinama metri dužine,a cilo vrime se danas na radijiman more čut,po portaliman pročitat pitanje,da kakvu taktiku triba primjenit za do karat doč,a taktike nima,oni šta su visili po konpjuteriman i razniman drugiman elektronskiman čudiman priko koji su karte kupovali,tribali su jemat sriče za “uletit”,a da jin se u međuvrimenu ne sruši sustav,dok oni ča su karte kupovali po starinsku,doč na boketu dat pineze i vazest kartu,tribali su doč u sitne jutarnje ure dignit šator i čekat osan uri ujutro da otvoridu bokete,oni moj “mali” doša je ujutro okolo tri ipo i govori da ji je več bilo u redu,okolo pet uri nji dvadesetak,a on je ubija malo oko u auti i okolo pet ipo kad je doša u red bilo ji je više od pedeset isprid njega,ali več je okolo devet manje kvarat jema karte u rukan,a onda kad je doša doma pala je karba,ko je dosad najviše vrimena čeka u redu za karte kupit,pa san tako ja bidan ispa sa najmanje staža,kad san jedan put sta u redu tri ure,a mala govori kako je ona najviše provela u redu za karte kupit,jedan put je bila tri ure i četrdeset i pet minuti u redu,a onda se javija oni moj “mali”da on mirita titulu onega koji je najduže u fili sta,a kako,a lipo,a najmanje od nas si u redu sta,je ali konta se i ono ča je spava u auti,a i nočne ure se duplo kontadu,ajde mali biš ča to ti se ne konta,ča ne konta,di su karte,cili grintav kako on nije prvi,da če vazest karte i nečemo ji vidit,oš,oš,kako neš,več su u vrtlu zakopane i par uri pri utakmice čemo ji uz jako osiguranje otkopat i u željeznomen sanduku vezanin lanciman za noge i ruke do ulaza od stadijona donit i kroza skener pronit…
Biče kome smišno ovo ča san napisa,a smijte se Vi smijte,ma če se ovi bokuniči karte u razno razniman Fort knoxoviman do dvadeset i šestoga čuvat.