Jema več nikoliko daan da je dijal plaže na Sokolani neupotrebljiv,opet su izbile stine i zemlja,a meni cilo vrime da kako još oba tomen ni slova nisan napisa,a ja njiman, jesu li bili ponovljeni izbori za Mjesni Odbor i kako mi je Marijo reka,nji su izabrali zato ča mi nismo dobro radili,a i još i to da ča če nan na sjednican točka razno,ka da oni nisu cilo vrime u selu i ne vididu probleme i da ne zaboravin,imali smo i točku u maškare di je Marijo bija ja,obučen u kaputin,sa fotoaparaton okolo vrata i eto,ljudi su izabrali i sad Van opet nevalja,a ko bi vama udovoljija,a da neka lipo gren,a fala van,fala,nima van druge nego se obratite otiman noviman koji jemadu večinu i koji su po selu prije izbori govorili kako čedu oni sve priporodit…

I ča su mi učinili,ali naču ga ja kad tad ko je…

Jučera ja na rivu jin krafnu (ka triba mi)okrenut put mora i najedan put niko sa jedne i druge bande vuče me za podan majice,gledan ja kad dva diteta i uglas če,bajba,balba cuto,tuto,ovo ja pisen kako su jedno i drugo govorili,a da bili ja napisa neka balbe poplavidu plazu i kažije ovi jedan rukon put Sokolane,kako čedu popravit plažu,pitan ja nji,a da je puno gluba i mole je spolko,gledan ja je li ovo koko snima pa če meknit na jubito,a i ovi ča su ji poslali,dobro su se kamuflirali,bilo je puno svita u kafičiman i nikako skužnit sa koje su bande došli,a po nji je došlo niko starije dite i privelo priko gornje bande ceste,e i ča san ja sad otoj dičici moga reč nego da ču ji poslušat i napisat i evo…

Znači plaža na Sokolani je opet evo vakva:

I ka ča morete vidit,pogotovo na onoj gornjoj slici,opet se uz zemlju moredu vidit i one žile od stabli ka i nikidan i more kako plaka oto zemlje je kafeno…

I pošto je bila velika rasprava oba tomen koji je ovo več put da se triba ono doli popravljat,koliko nas to košta,svaki put ponovni dolazak bagera,kamijoni žala,radne ure potrošene na saniranju,umisto da se jedan put napravilo onako, kako triba…

Pa ču ja evo meknit ono ča san dosad oba tomen pisa:

Naslov
Šta se ovo događa na plaži Sokolana?
Postavio:admin Datum:April 16, 2 025 10:31 pm

Ka ča znate,ono muleta doli na plaži na Sokolani je maklo ča i naravno,za očekivat je kako je selo podiljeno,dok je jednima drago da je oto plaže sad u komadu,drugi,pogotovo oni ča jemadu dicu nisu baš oduševljeni,jerbo da je dici bilo drago tote skakat,ali sad neču oba tomen,neka svak raspravlja onako kako mu odgovara.

Sad čemo o posljedicama koje su ostale nakon uklanjanja otega muleta,jer očito je kako cili materijal od razbijanja istoga nije uklonjen i sad zbog toga jemamo kafeno more,jerbo ono ispire ostatke koji su od muleta ostali i panika je ča če bit ovega lita,dok jedni mislidu kako če se to do lita isprat,ovi drugi govoridu da če se cilo lito  more,ka i sad,kafenit,pogotovo popodne kad učine donji vitar i valovi počnedu plakat oto plaže ,a treči govoridu,nikad van nevalja,ajme kad se ništa ne radi,ajme kad se čako napravi i onda van smetadu ovakve sitnice…,ajde pak,ma baš je sitnica…

Naslov
Amo ča vidit kako sad izgleda ono doli plaže na Sokolani
Postavio:adminDatum:April 25, 2025 12:20 am

Pitalo me nikidan da kako san ono napisa da če ovo lito Maještral uzmuljat more koje če zbog ostatak od srušenoga mula bit kafeno,a nisan baš toliko vidovit šta če bit ovega lita kad popodne punedu oni jaki Maještrali,ali sadašnjost baš ne obečava,ovo je snimljeno jučera popodne kad je puva slabašan Maještralič,more je izgledalo evo vako:

A ono materijala koje je ostalo od rabijenoga muleta je i po pličaku i po plaži,a moga se bija izbječ dupli posal,tribalo je samo ono materijala od razbijenoga muleta skroz izvadit i odnit ča,a ne ga ostavit doli za da bi se uštedilo na kamijonu žala i evo šta sad jemamo.

Naslov
A taman nan je u selo lipo sa turistiman krenilo,a mi…
Postavio:admin Datum:July 2, 2025 11:10 am

Ustvari,ama briga me za turiste,nego se naš svit ne more na Sokolanu kupat,evo govoridu,jema nikoliko daan da more zna bit kafeno da ga od gada ne moš gledat,a kamoli u njega uč,a sve zbog materijala koji je daniman na plaži i to,mireči nako na korake,došli smo do desetak metri dužni neiskoristive plaže na kojoj osin materijala viridu i nike žile,kako žile,a neznan,mislili smo da je to od nikud more donilo,ali nije,jerbo smo oto “granj” vukli pa smo vidili kako su to ustvari žile od stabal,a zanimljivo,govoridu ljudi ča se doli svaki dan kupadu da se uredno piše kako se u Kaštila plaže svakodnevno uređijedu-čistidu,a pa je li koko od oti ča ji čisti moga bija slikat,reč svojiman nadređenima kako ovo ovde izgleda i da  triba sredit…

Inače, jema več koliko vrimena da me zbog ovega po selu vučedu za rukav,da mi je od kratki,učinilo one od tri kvarta,a ja jin samo rečen,jemate sad novi Mjesni odbor,jesu li rekli da če oni sad drugačije,čak su ukinili i točku razno,jerbo ča če njiman ko govorit ča triba činit,oli i oni nisu po cile dane u selo i ne vididu probleme (to mi je bija reka Marijo),a pa je vrlo zanimljivo,nisan reagira par dan,baš za vidit kako to u zbilji ide,ali toliki pritisak vršidu na mene,zanje sinoč na Rivi, da san nakon toga iša doli lanpadinon sa mobitela vidit,a taman dokle san to gleda,eto jednoga ča se doli svaki dan kupa,a pa mi i on govori o boji mora,koje zbog ovega problema zna bit kafeno,pa mi je jutros kad san iša slikat reklo kako stranci slikajedu i lipu sliku šaljedu u svit,dokle jedni sa svojiman slikan privlačidu goste,drugi,sa ovakviman slikan iz našega sela odvlačidu goste, ča su u ovo naše bidno, malo,tokon desetlječi ispačeno misto,mislili doč,a taman nan je stidljivo,ali lipo ovo zanje vrime sa turizmon krenilo.Ali…
Evo jutros,kad ne puše ništo jakoga vitra,se more vidit lagani mutež mora,a kad pune ono jakoga Maeštrala da je to ajme:

Naslov
Evo su sredili
Postavio:admin Datum:July 4, 2025 11:35 pm

Zove mene jedan jutros u deset ipo uri na mobitel i pita di si,a evo me u Gradu,pa mi govori da su sredili ono dijal plaže na Sokolani, ča san pri koji dan pisa,ajde baš lipo,govorin ja,e ali,a ča sad ali,a nisu digli oni materijal ča je bija,več su na oto nabacali novo žalo i bageron izravnali,ama čekaj malo,bija je bager i nije diga oni materijal i maka one žile,več je priko onega svega posuto žalo i izravnano,da e,čujen sa druge bande,ama ne mogu virovat,a virova ti ili ne,to su tako napravili i kasnije kad san iša oto slikat,još mi je jedna osoba rekla kako su učinili,a ja i dalje ne mogu virovat,jednostavno ne mogu i dalje,dokle ovo pišen,mislin da su se oto dvoje okolo ove priče dogovorili,jer da nisu makli ono materijala,stvarno je nevjerojatno,ali vrime če pokazat,pa čemo bit pametniji…

Bilo je vako:

a od jutros je ovako:

Naslov
Koliko je duralo? Pet-šest daan?
Postavio:admin Datum:July 10, 2025 7:05 pm

Opet jutros,zove mene ovi jedan da mi je posla slike sa “pokapabane”,ča je o čemu se radi,pitan ga ja,a da mi neče reč, neka vidin slike,otvaran ja oto votsapa,gledan i naravno,opet Sokolana.
Doša ja nakon niki dvadesetak minuti doli na Sokolanu,a problem koji su riješili pri koji pet šest daan počeja se činit opet na isto misto di je i bija,pari ka da je nika vrst Bermudskoga trokuta,naspedu žalo i opet se pojavi zemlja,ali nije,nima to nikakve veze sa Bermudiman,več ima veze to,da se posal opet nije učinija onako kako je tribalo,a i sad vidin da mi nikidan oni ča su rekli za ono materijala koje je ostalo,ispod iskrenutoga žala ipak nisu lagali.

Evo tako sad to opet izgleda:

Naslov
Evo je opet sredilo
Postavio:admin Datum:July 13, 2025 11:00 am

U petak ujutro su opet nasuli žalo na ono zemlje ča se počelo pojavljivat na plaži nakon valov ča ji je činija donji vitar.Čak su po selu krenile i oklade,koliko bi vrimenski to sad moglo ovako izdurat,a ja neznan ča su ljudi tako skeptični…

Evo,to sad vako izgleda:

A bilo je ovako: