Evo če sutra sedmi dan da je izaša Mašogadur,a u selo se i dalje priča o tomen kako su se uvatili novoga popa koji se deboto još nije ni steplija i našli su mu za pribotunat kako na godišnjicu bonbardiranja nije pročita imena poginuli,a zamisto isprid starega kanpanela upalija sviču i odrišenje da isprid nove crikve i da je reka da pada kiša i da nima smisla po vakome vrimenu poč namo i na kraju su napisali ma nije on kriv,jerbo je novi zašto mu glavari nisu rekli za običaje našega mista? I njima je padala kiša.

E sad,ajmo ča po redu, ka prvo nije se dalo odrišenje isprid nove crikve,nego se dalo odrišenje isprid spomenika don Anti Rubignoniju i palin žrtvama  bonbardiranja koji se nalazi isprid nove crikve.(jerbo kad koko sa strane pročita oto kako ste vi napisali onda pari ka nikako čudno.)

Pod dva ako ste več kasnije išli ono ča se reče polizat ča ste prije toga rekli i spomenili da pop nije kriv jerbo je novi i da su mu to tribali glavari reč,onda se postavlja logično pitanje, zašto niste pecetu odma direktno uputili na glavare,a ne na bidnega popa? A je li koko nediju posli tega iša na misu i čuja da se pop na sve tri mise ispriča potomcima i ciloj župi jer je napravija veliki propust.A zašto? Zato šta nije od strane glavari upozoren na običaje! A zanimljivo je ovo selo kad se upusti u priče,pa se tako moglo čut da zašto u Mašogadur nisu napisali kako političari svoje vijence nisu odnili tamo na stari kanpanejal,jerbo pošto pop nezna jer je novi oni znadu,nisu novi pa su posli odrišenja isprid spomenika mogli bili učinit đir do starega kanpanela,misto stravičnoga događaja kad je u jednomen danu 79 Sučurani-ki izgubilo život i tamo položit vijence i upalit šterike,ali ne.

Ali,zato je bilo župljani koji su oti dan znali ča jin je činit pa su posli odrišenja i blagoslova mrtvima išli tamo isprid starega zvonika i upalili šterike na misto stradanja. Naši poginuli miščani su u slavu Boga sa svojim župnikon položili život za Boga i vjeru pod granatama pa nama nebi tribalo bit teško bar jedan put u godini poč jin se poklonit! Sramotno je da se sada pojedinci izvlačidu na časnomen svečeniku koji je u ovemu slučaju ni kriv ni dužan. Eto na, ovo je ča se sve po selu more čut o onemu ča se napisalo u Mašogaduru,a tamo ono kad san pisa onu priču sa Marijon na rivu,od njega san onda dozna kako ovo o čemu sad selo bruji mislidu meknit,pa san mu odma reka,Marijo to nije u redu da se uvatite popa koji se nije ni steplija i koji nema pojma od našima običajiman jer je novi,a ako to napišete onda čete me dovest u situaciju da ja moran branit popa,a svi ste svjedoci da san jedini ja javno onemu prije popu reka o tome zašto je prominija običaje,a vi ste onda mudro mučali. Zašto? Oni van je pop odgovara,a ovi ne? Koja objektivnost.

I na kraju za one ča neznadu polaganje vijenca i paljenje šterik isprid starega kanpanela godine 1989 je pokrenila udruga Podvorje.