Sinoč je u naše selo održan četvrti po redu Mašošef na kojemu su spizu kuvali veliki stručnjaci iz našega sela i bliže okolice,a kako je več nakon ure vrimena sve nestalo jema bit da je to bilo dobro,jerbo su se i teče lizale,a čije je bilo najukusnije odlučija je žiri sastavljen od oni ča su kuvali uz pomoč vanjski suradnikov koji su donili odluku, da četvrto misto i set noži dobije Čovik i balota koji su skuvali Čobanac od divljači,treče misto i ka nagradu onu najmanju od tri teče dobili su Plavi vitezovi koji su sa sebon donili cilu kužinu u kojoj su skuvali Obotnicu sa njokiman,drugo misto i onu malo veču teču od ove manje teče ča su je uzeli ovi prije nji iako su imali največu teču u kojoj su kuvali,dobili su Sučuraški vatrogasci koji su skuvali Gulaš od obotnice,a prvo misto i onu naaaajveču teču koja je malo veča od ove teče ča su je dobili ovi za drugo misto i duplo veča od one ča su je dobili oni za treče misto dobila je spiza koja se zvala Vepar sa Kozjaka koju su skuvali Sučuraški planinari,Moto klub Uspomene je skuva Orzo sa junetinon,Garaža je spremila Mašokokoš (vidičete na sliku, u svakomen bataku je bilo bar dvadeset deki),Maškare 1.su učinile Rižot od kozic,a one 2.Ništo sa telečin gulašon,dok su Veterani o Jadrana pekli srdele Ala Pella,pa se lipo zaplesalo,zapivalo,zabavilo…