Kako je u nedilju pala ona murva na pazaru,tako su iz grada po portaliman novinan,niko govori i na televiziji izašli sa podaciman o radoviman koji bi se tribali tote radit,pa se međuostalin tote moglo pročitat kako če se napravit i nova česma,sigurno bi uz banke i ona tribala bit kamena,jerbo se od izvođači radov spominje i Jadrankamen.

E i sad od kako su Sučurani pročitali to česma,sad je to udarna tema o kojoj se po cilomen selu govori,ma kako je nikomen palo napamet oto nazvat česma,kad smo mi to ovde zvali česma,jema puno selo došljakov ča su došli osvukud,pa se od nikoga nije moglo čut da funtanu naziva česmon,a šta je ovo,turcizam…

I iša ja danas okolo tri manje kvarat,računan luda je nika ura pa neče nikoga ni bit i na miru ču slikat ono doli ča je od pazara ostalo,a ostala je baš funta.. ups,česma pa san je zajedno sa iskopinan slika,a nisan ni izvadija aparat,a odo tamo,iz pravca “modne piste” čuje se,nemoj zaboravit slikat česmu,a jesi li slika česmu…nji petnajestak sidi na šentadan i govori o česmi,neka,baš super da čemo jemat i novu česmu.

I napiši, da mi ovde to zovemo funtana.
Evo san napisa.

Evo,ovo doli na slici je “ono”,umisto čega če doč opet “ono”,samo novo:

A na ovoj doli slici čete vidit ote iskopine ča su našli,a tribale bi pripadat onoj prije crkvi,ne onoj ča su je bonbardirali,nego onoj prije nje,crkvi Svetoga Luke,pa čak ima razmišljanji da je tote bila apsida,ali one gredu nikako polukružno,a ovo ča vidimo gre nikako pravilno iako se vidi tamo na kraju da stine gredu ka u kolunbar,ali ja mislin da su to sigurno temelji od onega ča je tote bilo,a šta mi nikad nečemo ni doznat ča.

A ovo na donjoj slici bi tribalo to bit dijal obale,a pošto je to sve zbog dušmani onda bilo opasano zidoviman,moglo bi se usput nazivat i obranbenin zidon,a ako je bija obranbeni ko zna koliko je bija visok i jesu li gori jemali one velike kazane sa vrilin uljen da dušmane, kad se sa brodi po zidinan počmedu penjat, moredu prolivat?