Nakon ča je Split to počeja jema več par miseci mečat i u nas je prošli petak doli na rivu uz znak od parkirališta za invalide meklo i sliku osobe u invalidskiman koliciman. Puno nji se pita,a ča jemadu mečat slike,oli nije dovoljno ča su znak mekli?
A nije,jerbo jema puno oni ča jemadu ote invalidske karte za aute,a ni blizu nisu od potribe za na oto misto parkirat,pa se sa oviman slikaman,takve osobe koje tote gredu parkirat, oče podsjetit da jin ota karta ne daje za pravo otet misto onoj osobi kojoj je to stvarno i potriba.

Jema san i ja bija otu kartu još tamo devedeseti godin i baš je to bilo super,moga san sa njon doč na mista di je inače bilo zabranjeno,a parkira bi fiču usri grada,isprid stare bolnice i ča se jednoga dana dogodilo,a to da san baš tote bija prolazija i jedan čovik iz aute me pita da je li mu mogu pomoč,doša san do njegove aute,a on je otvorija porta pak i pita da mogu li izvadit invalidska kolica i meknit ji do aute,a on se sa sica od aute pribacija na sic od invalidski kolici bez koji se ne more nigdi maknit. I ča san ja nakon toga napravija? Vazeja san otu kartu za invalide ča san je jema i raskida je u najsitnije komadiče i više mi nikad nije palo napamet vazest otu novu kartu,niti na ota mista parkirat.