I druga palma isprid zgrade na Gospici je stradala od one zločeste palmine pipe,pa su tako nikidan došli iz Parkov i nasadi otpilali je i odnili ča,a ja san taman trevija kako je Vili sanira prostor di je pala,pa je podiza travu i nasipa ispod zemlju da poravna udubine.
E Vili,eto opet posla,a,opet repriza od prošlega puta,cipanje i komadanje ostatka debla ča je osta u zemlji,a nije,smije se i govori mi da mu je reklo iz Grada da neka to ne dira,da če jedan dan doč bager i sa njin če te ostatke pikamirat,ajde baš lipo,je,je,eto to mi je ka božičnica.

Nego sad mi ovi prostor pari ka nikako šušavo,prazno,a očeš li čako novo posadit? A da mu je baš niki čovik malo pri ča je proša, ponudija da jema sadnice od palmi,pa da če mu do koji dan donit.