Ili ti ga u slobodnomen prevodu,O moj Bože,pogledaj plažu kako izgleda,gdje smo mi ovo došli,izjava je mlade strankinje koja je sa momkon ili mužen došla na Sokolanu se kupat i kad je vidila kafeno more i ono kafene plaže sa nikiman žilan,sela je na pod pokrila lice i uvatila se plakat,dok je momak oliti muž,nezna se ko,tješija,a onda kad se smirila,jednostavno su se pokupili i išli ča.
Opisana scena ispričana mi je od oni ča su to vidili,a pa su se ljudi koji su tote bili,a znali ingleški,izvinjavali mladomen paru,ali zaludu.

E sad vratimo se malo unazad,točnije kraj šestoga miseca kad je ministar turizma reka medijiman, da neka sad ne pišedu o cijenama,jerbo da nan to donosi puno štete.
A ma ne triba niko o ničemu pisat,sve ono ča turisti vididu i dožividu ovde kod nas,ka i mi kad idemo vanka u realnomen vrimenu,priko videj i slik na društveniman mrižan je sve vidljivo na svakomen kantunu ove naše balote Zemlje,tako da je sigurno i ovo ruglo od naše Sokolane več ko zna koliko puti opjevano ričiman “pohvale”,ka i slikon,onon pokretnon i nepokretnon,tako da se sljedeči godin mi u našemu selu tribamo dobro pripremit,biče takva navala turisti,da čedu i bivši kokošinjci,ko ji još jema,bit priuređivani za turiste primat.

A tako nan je lipo u selo nakon duuuugo godin sa turistiman krenilo i vidili smo kako jin ne triba puno,jer se fala Bogu i ne moremo sa otin “puno”pofalit,samo jin daj oto malo čistega žala i mora i oni zadovoljni. A mi ni to nismo u stanju.

Evo vakvo je bilo more:

Opet viridu one žile ka i prije,turisti su provali to maknit da se koje dite ne ozlijedi,ali nisu uspili

A ovu san doli sliku približija pa morete vidit razmjere ote zemlje ča izvire na plaži,sa juga je to više izraženo,sjeverna strana pomalo,ali sigurno ide prema izgledu one južne bande i prije je to bilo okolo niki desetak dužinski metri,a sad je to več i blizu dvadesetak metri…