Pitadu me da kako još ništa oba radoviman ča su sa južne bande Kozjaka zbog tunela počeli nisan napisa,a čeka san za vidit oče li se,kako če se,šta če se… oba tomen u selu govorit,a kako san vidija da je zainteresiranost iznenađujuče velika,evo…

Ovo kako se, ča se tunela tiče,u subotu počelo kopat i sa južne bande Kozjaka,krenile su razne priče,a pošto je sve krenilo u subotu i radilo se,kako govoridu pod rasvjeton do jedanajst ipo uvečer i nastavilo u nedilju,skupilo se gori svita za vidit o čemu se tote radi,jerbo zašto se u subotu krenilo , po noči radilo i u nedilju nastavilo,a još zanimljivije od svega je kako uopče nima nikakve tabele,jerbo danas i kad se kokošinjac uvatiš radit moraš tabelu o gradnji meknit,tako da su ljudi bili ne malo iznenađeni,pa su zbog toga i policiju obavijestili,napravija se i zapisnik…

Da ja sad ovde u detalje ne prepričajen, pročitajte ono šta je Željan napisa u prijavi koju je preda policiji:

U selu se nagađa jesu li oti radovi ča se trenutno odvijadu, na mejašu od našega sela ili su več dobro zagazili na Sučuračko,a na tabeli ča su je donili u ponediljak okolo desetak uri među ostalin piše i katastarska opčina Sučurac,a sad, je li se ovo ča se sad kopa čini u Sučurcu ili u Gomilici neznan,ali je jedno sigurno,a to je da če se cili oti materijal od iskopa vozit u našu Kavu,zato jema bit da se i činidu oni radovi ravnanja sjeverozapadnoga dila Kave,koji se jema petnajestak daan primječijedu kad gremo iz pravca Splita prema Kaštiliman di se vidi,ono ča se do sad nije moglo vidit(izravnani dijal terena),e sad pitanja po selu,a kud bi oni oti materijal onda vozili?

A nameče se logični odgovor,vatrogasnin puten kojin su bageri išli put mista di se sad kopa,jerbo su se svi pitali,kako niko nije vidija da se u Gomilici bageri penjedu put uzgor,kako su uopče došli,labudicon nisu mogli,a onda ka ča to činidu indijanci,po tragoviman se moglo vidit kako su se o Ploč-istočno od našega groblja penjali put uzgor,išli dalje vatrogasnin puten i onda se spustili onin puten koji gre doli prema Gomilici i jednu stotinjak metri ispod počeli sa otiman pripremniman radoviman iskopa…

E sad,ako se oto materijala bude vozit vatrogasnin puten od Gomilice put naše Kave,kako če se to izvest ako znamo da u devedeset posto oto puta nije široko za da bi se dvi aute,a pogotovo kamijoni oli danperi mogli mimoič ili če najpri svi kamijoni u koloni odit od Gomilice put Sučurca,a onda se opet u konpoziciji,prazni vračat nazad,a još zanimljivije je kako če u tomen slučaju putnik namirnik koji se gori uputi auton,uopče moč tote proč ili če prolazak bit zabranjen,jerbo če kamijon imat prednost,a isto tako opasno če bit i nanoge odit,a to bi trajalo,jednu tri godine,bar tako piše kad bi to sve tribalo bit gotovo,jedino nas more utješit,da pošto to radidu Kinezi,kako če to u zadanomen roku bit i gotovo.

U raspravi po selu se more čut da ako če,se stvarno otin protupožarnin puten kroza naš Gaj vozit,kako bi oti teški kamijoni do Kave dolazili,bi li se spuštali na Ploče i onda lomili livo prema Kavi,a znamo da ni tamo nema širine i da su sa strane privatne parcele,ILI, se več zna di bi tribala proč druga faza-cesta od tunela ča če prolazit priko nas i onda če usput jednin “udarcen” riješit oba problema…?

E sad,ja san po tomen pitanju drugačijega razmišljanja,mislin da oni nečedu odit doli put Ploč,pa onda livo put Kave,več meni sve pari kako če na onemu bogenu ča se nalazi kraj onega stupa od dalekovoda di se lomi put nizdol,nastavit ravno, probijanjen puta prema sjevernozapadnomen dilu Kave,ono di san reka da su izravnali,jerbo bi jin to bilo najbolje i najjednostavnije jer mislin da je to područje od Hrvaski šum,a ča če zapravo bit i šta nas čeka u budučnosti,kako če to sve skupa izgledat,vrime če pokazat,a mislin i da nečemo baš puno čekat,za oto vidit,jerbo ako radidu pod svitliman do kasno u noč i nediljon,znači da je velika priša…

Ovo je oti bogen,a strelicu san nacrta u pravcu di bi oti novi put možda odija:

A na ovu doli sliku san sa ovon bilon crton pokaza di bi otprilike oto puta išlo,ako to mislidu učinit:

Ovo sve gori rečeno je jedno veliko naklapanje,žalosno da građaniman našega sela niko ništa ne govori,a ljudi se bojidu velike devastacije,jer ako če se uništavat tamo di je u projektu zacrtano da če prolazit ceste od tunela priko Gomilice,Kanbelovca,Lukšiča i opet se vračat u Kanbelovac za spojit se na Magistralu,zašto činit devastaciju vamo,na drugu stranu,pitadu se ljudi po selu i upiredu prston u Mjesni Odbor i pitadu da ča smo učinili i šta čemo napravit po tomen pitanju…?

Ako niste do sad vidili,evo iz daljine di se to kopa i koliko je daleko od Lukova-to je ono slovo S ča ga je priroda učinila od stinj:

Ovo šta vidite iskopano,e pa pogledajte u sjeveroistočni dijal toga iskopanoga-vamo prema Lukovu,e nigdi na otoj visini bi triba bit ulaz ili kako očete izlaz od toga tunela…,govori se nigdi o tridesetak metri spuštanja…

I eto,za sad toliko.