Napalo me nikidan da kako san moga nako napisat: “Eto,ja toliko,jedva čekan ote pahuuulje,čuja san da su naši u Kaštila i u Splitu za snig spremni,tako da če bit zanimljivo za oto vidit.”
Pa je onda oti isti nastavija,da kako ja to znan da ovi put u Kaštila neče bit sve kako triba,vidi da su oni to ozbiljno svatili,stožer navrime oformili,sve zadatke podilili,a ti onako.

Slušaj ti,pazi vako ča če ti sad ovi reč,ma moredu oni oformit još jednu trista oti stožeri i dobro je da su oni to oformili i da se iz jednoga centra u nekoj možebitnoj hitnoj i puno teškoj situaciji sa svin upravlja,ma ti jedno triba bit jasno i tebi i meni i svima nama skupa,da kad ovde padne snig jednostavno nastane jedan veeeeeliki kolaps i sve skupa se pritvori u jedan veeeeeliki cirkus,fala Bogu jemaš i ti godine ka i ja i doživija si par snigov isto ka i ja i znaš da je to tako uvik bilo i uvik če bit,e i sad sasluša je on mene,pa je na kraju opet bilo,je,ali…

E i sad ga čekan za trevit u selo,a čudno mi je da ga nisan ova dva dana vidija,biče se sakrije, čeka da malo prođe vrime,misli da ču ja zaboravit?

Znači,niti su vozači krivi,ka ča ji je nazvalo nesavjesniman jer su na cesti bili bez zimske opreme,jerbo je najedan put krenila mečava,a ljudi su panično sa svoji radni misti krenili put doma,niti su krive gradske službe,jerbo i one ča jin svako malo snig padne, iznenadi,a di neče nas.

E sad,posli otega prvoga udara,je li se moglo kasnije više učinit za da površine ne smrznedu? To neka ovi u stožeru između sebe u četiri zida riješidu. Po onomen šta smo vidili u Splitu,može.Ulice u Splitu su se doslovce bilile ča od soli,ča od sipine,a priča mi ova jedna žena ča stoji u Zvonimirovoj kako su jin graske službe isprid ulaza ostavili i po vriču soli,ako jin kojin slučajen triba,za dodatno posut.

I sad di je i kad je u ponediljak nastala največa panika i kroza selo bilo najviše aut,a onda kad je dicu tribalo odvest za da prispijedu u školu,e to je onda bija u pravomen smislu riči cirkus,ovi mi jedan govori da se baš u to vrime naša na cesti i da mu je samo od anbulante do onega semafora kraj škole tribalo cili petnajst minuti,a beštimalo se i na onega koji je reka da če škole bit,a moran odma reč da ravnateljica nije ni najmanje kriva,ona je dobila naputak da se nastava triba održat (kako mi je rekla nije od Grada),a onda se vidilo da su falili, pa je ono polovično dice ča je došlo jemalo nastavu samo tri školske ure,a da nije bilo toga,tri dila od aut,takozvani nesavjesni vozači u tu frekventnu uru kad se je i stvorija prometni čep nebi bilo na cesti,jerbo ko je ko moga, nije dite pustija na onu mečavu da gre nanoge,nego ga je do škole odveja auton,a u to vrime ona uzbrdica-nizbrdica od Gospice do vatrogasac je bila jedna od najopasniji dionic,zbog zaleđene površine,oni ča su odili uzgor su uz šlajfanje,odili utreso-zanosilo ji je vamo-tamo,(na jednoj od sliik čete vidit tragove),a ovi ča su odili odozgara su se u pravomen smislu riči klizali,a i jedni i drugi završavali u drugi,suprotni trak,tako da je bilo i bliski susreti,tako da je puno nji kad su vidili da je vrag odnija šalu ostavljali aute sa strane i odili dalje na noge.

Eto ga na u kratkiman crtan kako je to u ponediljak bilo kad je u selo pa snig.
Vidičete na sliku da je bilo i oni ča su mečali na kola lance,a pričali su mi da je ovi jedan u selo i to sa lanciman lipo “zaplesa”.
Ovi sa Smarton ča čete ga vidi na sliku mi je reka da neka napišen, Smart u snijegu,evo san napisa. 😀