Ono pri dva dana pisa san da kamijon o smeča ne more doč do kontejneri za ispraznit ji i onda kasnije kako je jedva od aut proša prema mulu,a nisan uspija vidit koliko je problema jema za proč rivon od parkirani aut. E,a u subotu kad je bija susret oldtajmeri eto i kamijon o smeča i zamisli, jema je veliki problemi za proč rivon jerbo su ka po običaju tot bile parkirane aute i vozač se za da ne izgranfa koje auto iša dat na sjevernu bandu,a tamo su ga čekale grane o stabla tako da se lipo zabavija.A onda tamo kad je doša nasuprot pazara za ispraznit ona četiri kontejnera dogodilo se isto ka i zanji put,radnici opet nisu uspili ispraznit sve kontejnere jerbo su opet odisprid nji bile parkirane aute. I iša ja do tamo vidit i pari mi se da je ista ona zelena kesa u onemu neispražnjenomen kontejneru ka šta je bila i u četvrtak kad se dogodilo isto ka i danas da se od parkirani aut do nji nije moglo doč za ispraznit ji,a po vonju jema bit da je stvarno u njemu smeče od prije par dan tako da ka ča če te moč vidit na slikan ota zelena kesa više nije na vrju,nego je propala prema doli jerbo po ovome litnjemu zvizdanu u limenomen kontejneru sa sadržajen koji je u njemu pari ka u expres loncu.

I još ništo,čitan u Slobodnu kako pišedu da se u Kaštiliman smeče iz kontejneri ča su na Kaštelanskoj cesti skuplja svaki dan,a u sporednin ulicaman svaki drugi dan,a evo u Starčevičevoj di ja stojin smeče se kupi petkon i utorkon,a tamo prošlu sedmicu je to bija četvrtak pa iza toga tek u utorak.

Isto smeče stoji od četvrtka i ko zna kad če ga uspit bacit?