Vidin kad uđeš u priču da puno nji nima pojma o kolačiman koji su se ovod u nas za Uskrs činili,ali če se uredno sa tebon karat,jerbo mu nije drago kad mu isprid svi pokažeš kako o nikiman stvariman nima pojma,a pravi se ka da je popija pamet cilega svita…

U ona prije vrimena,moja mater je tisto za sirnice mišala u oni veliki lateni lavapijat,niko nije smija u kužinu uč, niti se poč napit,jerbo je bilo odma vike,zatvori vrata,tisto se neče dignit,a unutra je bilo jednu iljadu stupnjev…
Danas to ona moja čini na sasvin drugačiji način,(zabranilo mi je da izlazin u javnost kako)nima više vike zatvori vrata i veliki stupnjev,a tisto se miša u plastični maštijal…

Za sirnice svi znadu,a jema jednu miljun recepti i svi su “doktori”,ali svi mi ča ji jimo,znamo da je malo oni dobri sirnic,jerbo moreš ti cili život skupljat recepte,jer misliš da če sa otin novin sirnica ispast kako triba,ma ti je zaludu,ako ono ča se reče, “nimaš ruku”za oto,eto mi doma one ča Ona ispeče uvatimo ji se jist,ka da sutra ne postoji,tako da odma u startu sataremo lipi dijal,pa ji mora sakrivat…

A pa onda orahnjača,ista stvar ka i sirnica,jerbo se čini od istoga tista,ali je ovde bitna i paštela,kakvu češ učinit,Ona se uvik jidi jerbo joj se nakon pečenja gornji dijal rascvita,a to je ka bitno,ma ča rascvita i da je ne moreš na fite kidat,več da je žlicon triba grabit,najvažnije je da je lipa za izist…

Evo npr.puno nji,”ovi novi”nisu ka dica za Uskrs dobivali svoj kolač,oni okrugloga oblika za mušku dicu,dokle su ženska dica za Uskrs dobivale gusku,to je bila tradcija koja se prinosila sa kolina na kolino.

Kolač je okrugloga oblika sa udubljenin dilon di se nalazi jaje koje se učvrsti sa dvi trake tista u obliku križa,dok je guska izduženi kolač u obliku pletenice koji u gornjemu dilu isto tako jema smišteno jaje,koje je ka i na onemu okruglomen kolaču,učvrščeno sa dvi trake od tista…

Sestra i ja smo uvik ka dica dobivali gusku i kolač,a isto tako se i do dana današnjega ota tradicija nastavila,za našu dicu,nečakinju,nečaka…