Rastavljadu se obe liste na proste faktore,a pa ča je ovome tribalo ovo,a ča onemu ono…

A ja sad ovde neču puno pisat u nikomen negativnomen kontekstu ka ča niko misli da ču, ali mogu samo reč kako na HDZ listi  imamo osobu koja je meni za prošle izbore rekla kako je baš dobro da san učinija nezavisnu listu i da če mi on prvi dat potpis jer je ovo mašo ča se od sela učinilo (nezavisna lista mora skupit trideset potpisi) ne triba,fala ti,govorin ja njemu,ne želin te stavit u nezgodnu situaciju,jer ti si ipak njiov simpatizer,naravno,uvik bi mi to negira,ali ja puno ne falijen,a evo i dokaza,samo čekan kad ču ga u selo trevit,onako na rivi di jema puno svita,pa ga pitat, kako je sad na jedan put prominija mišljenje??

Pa onda visoko pozicionirano na toj listi imamo i osobu koja je na sedmoj sjednici Mjesnoga odbora jedina od devet prisutni članov bila suzdržana kad je iznesen prijedlog da nan iz grada podnesu financijski izvještaj koliko je u Sučurcu uprihođeno sredstava u 2022 godini,a koliko se od tih sredstava u vidu investiranja vratilo nazad,jer kako stoji u statutu grada Kaštili,od uprihođeni sredstava u Sučurac se kroz investicije triba vratit  35%

A pošto se u selo sve zna,govori se kako pojedini sa HDZ liste moradu vratit“dugove“pa ma ča to značilo,a onda u nastavku kako se pušedu, da čedu nas sa„zvučniman“imeniman pomest tako da o srama u selo više nečemo dolazit.

Šta se mene tiče,ovoga san se uvatija da sam sebi mogu pogledat u oči i reč,pokuša si ništo napravit,a ako oni dobijedu neznan ča moredu sebi reč,jer to da čedu razmišljat onako kako bi oni tili,to sigurno nečedu,jerbo kako ko ja znan,onda  i oni sa HDZ liste isto tako dobro znadu kako je premijer Plenković javno reka da to tako ne ide,onu večer predsjednički izbori kad je načelnik Klisa Milanoviću čestita pobjedu na  izbore,Plenković je tad poručija:“Poruka je svim našim dužnosniciman da malo prate što je politički stav stranke da bi znali kako se postaviti“.

Toliko o tome da če moč koko reč kako je doša na  HDZ-ovu listu od Mjesnoga odbora  jerbo oče ništo prominit,znači po ovome izgovorenome minja se samo ono šta vrj stranke reče da če se prominit,bilo to u Gradu Opčini Mjesnomen odboru… svako triba gledat ča čemu oni navr njega reč da on doli more ili ne more ništo učinit.

Ali ne moredu se sad zbog njiovi odluk da budedu na listi HDZ-a ti ljudi osuđivat,jednostavno su oni zadovoljni kontinuitetom rada ote stranke u našemu selu,koji očedu sa takvin kontinuiteton nastavit,dok osobe sa nezavisne liste,nisu,mi očemo ovo dosadašnje stanje u našemu selu iz temelja prominit.

Znači niti ja,niti mi sa nezavisne liste u ovu priču nismo ušli zbog natjecanja ko če na izborima pobijedit.

Očemo li izgubit izbore,a izgubit moremo smo ako ne dobijemo večinu, a dobro čemo izgubit,glavon kroza zid se ne more,samo neznan ča san izgubija,kako ja,tako i ostali sa naše liste, jer svi mi koji stojimo u našemu selu vrlo dobro znamo ča se u njemu zanji trideset godin učinilo,a jedini koji moredu čako izgubit oli dobit ,smo svi mi,stanovnici našega sela.

Pa onda priče o nama nezavisniman, da smo ludi,kako nas triba poslat na promatranje,ča van oto triba,oli neznate kako ljudi za vas iz dišpeta neče glasat,nečete uvatit ni za papar,jer je ovo takvo selo,neče za dišpet na izbore izač…

Znači vako,opet ču ponovit,imamo dvi mogučnosti,morete birat kontinuitet,tj.nastavak kontinuiteta i  „prosperiteta“ koji je  u zanji trideset godin ovo naše misto“ priporodija“ pa glasajte za HDZ-ovu listu ili nezavisnu listu,koja če sve za sto i osandeset stupnjev priokrenit…

Naravno,bez masovnoga izlaza na izbore ne tribamo se ničemu nadat,ustvari imat čemo i dalje kontinuitet od zanji  tridesetak godin,jer indiferentnost = je slaganje sa dosadašnjin stanjen, pa  ako zbog toga ne budemo jemat potribnu večinu,a šta se tote more,najlakše je po kafičiman i šentadan govorit,po društveniman mrižaman napisat kako nevalja ovo ili ono,kako bi tribalo vako ili nako i to je plafon,nema ono amo se ča uvatit i učinit promjene,kad sastavljaš listu onda bude, ma pusti me stat,a ča to meni triba u životu sa određeniman likoviman posla jemat,je u pravu ste i ja san se puno puti zapita ma ča meni ovo triba,je li ti selo bitnije od zdravlja koje svakodnevno gubiš,pokušavajuči ništo za selo učinit,a kod svakoga toga pokušaja nailaziš na razne prepreke i podmetanja sa svi stran,ali ako želin u ovome svomen selu i dalje stat,(a ima desetak godin da san u razmišljanju poč ča)onda mi oto i ne pada toliko teško,jerbo kad vidiš da si uspija  pokrenit i natira onega kojemu je to posal, da je o problemu počeja razmišljat i iznalazit mogučnosti o njegovome rješavanju,e onda rečeš sebi,jesi se satra,ali ipak postoji nada i ono najvažnije,more se ako se oče.

Znači nima puno mudrolije imamo dvi liste HDZ-ovu i kotinuitet od zanji tridesetak godin ili nezavisnu listu koju predvodi Ivan Kovač Matela sa kandidatiman koji,ako dobijedu večinu, če sve učinit za da bi se u selo napokon počelo činit ono šta svi znamo da je odavna tribalo napravit.

A građani našega sela če odlučit,ono šta bi tili,jerbo oti dan kad su izbori,najjače „oružje“kojega se svi političari bojidu je olovka koja če zaokružit kontinuitet ili napredak,a jedino veeeliki izlazak birači more napravit promjene,jer lista HDZ-a ima birače koji sigurno izlazidu na izbore,a ova nezavisna lista nema,zato su na dan izbori za Sučuraški Mjesni odbor koji čedu bit 16.veljače ono ča se reče „škare i sukno“ u rukama miščani koji očedu da nan se selo napokon pokrene,ali opet ponavljan,to moremo učinit samo sa masovnim izlaskon na birališta,a ako očemo nastavak kontinuiteta od zanji tridesetak godin,a onda ostanite lipo doma tako da moremo i dalje govorit kako nan je misto u…

I na samome kraju,ne tako malo važno,zna se i to vrlo često reč,ma neš ti Mjesnoga odbora,ča se tote more napravit ili kako Mjesni odbori uopče nisu bitni,ali iduči put kad tako ništo promislite,samo se sitite ovi sadašnji izbori koji čedu bit za osan daan i šta sve činidu  kako bi u MO-u opet  imali večinu…

A pa se nameče logično pitanje,zašto HDZ svakako oče imat u MO-u večinu,kad su Mjesni odbori  nebitni??

Znan da san u textu dosta puti ponovija jedne te iste fraze,ali u razniman kontekstiman,ipak je ponavljanje majka znanja ili ti ga na latinskomen Repetito est…(asti uvatija san se da ka ča to političari radidu,se gren pravit pametan i poslovice na latinski pisat,e neš ne)  😀