Danas san učinija đir priko rive i doli uz more,pravac prema Bobisu vidin ja priko oka da mi je ništo neobično,pogledan malo bolje,asti,a ča je ovo između dvi šentade,isturena prema naprid,biče da bude uočljiva,stoji nika klupa,gledan,trljan oči,asti pa ovo bi tribala bit ona takozvana,pametna klupa,nije ista ka one ča ji je meklo po Splitu,jerbo je prostor di se sidi učinjen od drveta,a sa strane stoji panel,koji otu klupu čini pametnom.
E i sad gren ja do oni oni ča su na drugomen kraju Rive i govorin dobili i mi pametnu klupu,a kad je meklo,a nji desetak me pogledalo,ali niko ne obada, ka da ništa nisan ni reka,a ka botu se svako od nas opeka,nima zaličanja,sve triba pomalo,a ja opet,kad je meklo onu pametnu klupu,a sad je nastalo komešanje,koja klupa,di ti je ta klupa,a ovi jedan ma ovo je opet nika njegova zajebancija,on je malo pri tamo proša i nije ništa vidija,a znaš ča promini očale,gledadu sad svi put zapada,a ovi jedan je i iša do tamo,pa maše,je,je evo je ovod…
E pa se sad počelo sa pričon o izborima,evo nan je i klupu prid izbore meklo,možda to i nije zbog izbori,nego je eto, slučajno sad stavilo,reka je ovi drugi,a je,je,sigurno je slučajno sad stavilo,ali odavna smo mi,reka je jedan,da su izbori bar svake dvi godine,na Rivu bi po mramorniman pločan sad odili,a ne po rupaman i goban gnjate iskričali.