Zašto?A eto zato.
Upa san u jednu priču oba ovemu,kako roditelji jemadu problem,jerbo očedu da jin dica u ditinjstvu ostanedu dica,imačedu vrimena za surovu stvarnost…

Pri nikoliko godin pisa san oba tomen kako se krenilo na dicu,da Dida Mraz ne postoji,najnovije ove godine,ka ča smo u novine mogli pročitat,kako je mater jednoga prvašića iz jedne Osnovne škole sa istočne strane Splita rekla,da je vjeroučiteljica dici rekla kako nima Svetoga Nikole?Čekaj malo,a prema predanjiman iz doba kad je Sv.Nikola živija znamo kako je on poklanja onima koji nisu imali,ako u to ne virujemo,a zašto bi onda u druga predanja virovali…?

Ma ča sad ja ovde mogu pametno napisat,mogu se samo od prije ponavljat,pa evo dva texta ča san ji oba tomen pisa:

naslov-Ajde pustite bar dicu na miru i ne kredite jin ditinjstvo

Mi stariji moramo se potrudit da jin ditinjstvo šta dulje traje.

Ma zanimljivi smo mi narod,malo nan je ča se mi veliki među sebon karamo (bar da znamo zašto),nego na svake načine u oto očemo ubacit i dicu,a bidna dica bi u dane oko blagdani u dvanajesti tila dobit samo darove i briga ji je li Dida mraz komunista oli je demokratista. Vidi mene, Dida mraz komunista. A e,pari smišno,ma je ustvari žalosno. Ka prvo kako Dida mraz more bit komunista kad je iznika iz kolijevke svjeske demokracije,ča oče reč Jamerike,ali je činjenica da su neobrazovani toliko naprasiti,pa čak se more reč i nasilni u turanju svoji laži da se ostaliman ne da s njiman uopče bakčat.ALI.

Jema daan kad se ono ča oni reče digneš na livu nogu,e i taman oti dan trevija mene u selo jedan sa oton teorijon,a odma na početku triba naglasit kako je to potomak od oni ča su u ono vrime do devedeseti, ne virovali,nego se i obučivali u dide mraze i širili tezu da nima ni Sveti Nikool,ni Sveti Luciij,ni mali Isusi (o velikomen da i ne govorin).Ali,sad su se “dobili novi zadaci”?sada je najedan put za ote postalo normalno da za ono protiv čega su bili, danas opravdajedu kako je ispravno,a u ono ušto su do onda virovali je krivo?

A mi? mi ostali moramo mučat i slušat ča oni pamentoga jemadu za reč,a kad mu spomenete kako je do nikidan drugačije govorija onda mu je največi doseg opravdanja napad da ste jugonostalgičar,da niste prilagodljivi,čemu? njegovome razmišljanju,a zanimljiva su ta razmišljanja ka npr.jedno od oti kad je ovi reka da koliko su zlo napravili Staljin,Čegevara…onda je svaka daljnja rasprava suvišna ka i ta kad san ovo lito nosija ono majice sa Čegevaron ča mi je za rođendan poklonija oni ča je nebi ni u kuči sa zatvoreniman škuran da ga ko ne vidi nosija, zaključija da nan u selo živi bar jednu sedandeset i pet posto “lumeni” kojiman san triba objašnjavat da je rič o revolucionaru (zaludu) jer su svi ka papiga isto
ponavljali :”Ča če ti oti komuništa na majici?” Svaka daljnja priča je suvišna.Čegevara komunista?ajme nan.

I dobro nan je,biče još gore. I stvarno se čovik zapita jeli se isplati sa takiman uopče o bilo čemu raspravljat,jer na sviman meridijaniman ovega svita,u najpoznatijiman bjelosvjeskin reklamaman okolo ovi dan u dvanajestomen misecu je sve u stilu Dida Mraza,a mi nismo izdvojeni otok i ote reklame i razne filmove sa Didicon u glavnoj ulozi gledadu i dica od “oti”,koja moradu bit zbunjena,jer jin se sa jedne bande govori jedno,a od škatule koja jin otvara svit dobijedu sasvin drugu informaciju.Npr.pri dvi godine je po prvi put u Hrvaskoj-Zagrebu  bila i utrka Dida Mrazov, koja je u zapadnomen svitu kojemu mi toliko težimo stoljetna tradicija? Samo nisan iša za informacijon jeli postojala koja skupina sa strane koja je bila obučena u … i vikala …? Aj pa neka mi ko reče koji je to izmišljeni lik toliko poznat na doti jednome djeliču naše Zemljine balote,a zanimljivo je da mu se ne veselidu samo oni mali,več i oni veliki.

naslov-Evo i oni pet lajoni ima ništo o Dida Mrazu za reč

Evo ji opet nji pet lajoni Domina,Mandina,Filomena,Kate i Marijeta od koji svaka potiže na svoju bandu stranke koju simpatiziradu, dok je jedina Marijeta između nji apolitična,naravno,koliko se to u današnje vrime more bit.
Ovi put jin je glavna tema o tomen je li Dida mraz postoji ili ne postoji,a priču je prva započela Kate.
A jeste li čuli ono da Dida božičnjaka nima-jednostavno ne postoji.
A ča je sad Kate,a? I to si došla nan reč,a umalo pa čemo još i dvista godin kad se zbroji sve zajedno nas pet uvatit. A je Kate dobro ti je Filomena rekla nebi da smo dica o sedan godin pa nan ti sad očeš reč da Dida mraza nima

. Ma nije samo dida mraza nego i Dida božičnjaka opet če Kate. Ni Dida božičnjaka nima,ma nemoj mi reč, ironičnin če tonon Mandina. Znaš ča Kate ajde ti lipo kvragu i ča nima Dida mraza,i malo tiše govorite da vas ona moja mala ne čuje jerbo če se još uvatit plakat raspištoljila se Domina. Asti,a kako to više nima Dida mraza je li mu se šta dogodilo,a baš je cili smišan nako bucmast obučen u crveno sa bilon bradon i onon kapicon na glavi,ne mogu virovat da ga više nima,govori Marijeta.

Ajde Marijeta ima ga kod tebe ne boj se i prije koju večer je jedan oko jedanajst uvečer bija,a neka oni tvoj bidan tuče more. Ma je li Kate ono je tražija di stoji niko dite,a ti si cila zločesta,jerbo si vidila kako je uša,a nisi vidila kako je odma izaša. A je,je bolje mi je mučat da čako ne bi rekla. A šta to imaš za reč? A eto san ti rekla. A šta si mi to rekla? Ajde dosta vas dvi,niste se vidile jema par miseci i odma ste se počele karat.

Nego reci ti nama Kate kako to nima Dida mraza ? Nije Dida mraza nego Dida božičnjaka.
Dida božičnjak je bija zamjena za Dida mraza tako da ne stvaraš još veču zbunjozu.
Ne stvaran ja Filomena zbunjozu nego samo govorin o komen je rič,a govori se o Dida božičnjaku. Znaš ča Kate u oto Dida božičnjak je niko prioblikova Dida mraza jerbo su pametnjakoviči tili da je Dida mraz komunistička tvorevina,pa su se sitili novoga imena koji ima veze sa Božičen. I sad ti meni očeš reč da sad ni oto ime isto tako nevalja?

Ajme Domina ča si dosadna,ma ne govorin to ja. A kako ne govoriš ti,gledan te,otvaraš usta,slušan te i onda mi sad još očeš reč da to ne govoriš ti.
Ajme meni Domina, satrala si me. Ja san tebe satrala,a ti nas nisi. Govoriš več po ure vrimena,a ništa nisi rekla. A kako ču reč kad me svako malo prikidate.
Aj govori onda i da je niko nije prikinija jer teta Kate ima ništo puno pametno za reč. Aj kvragu ti i ča ja iman pametno za reč.

Jesan li ti lipo rekla da to nisan ja rekla. Ajme meni očeš li više počet.
Evo na podatak koji govori kako je nemoguče da u jednome danu koji zbog vrimenski razlik traje okolo 31 uru Dida božičnjak… nije nego Dida mraz, ajde Mandina eno namo, da Dida božičnjak ne more kako su izračunali u sto osan milijuni kuč, ovo se odnosi samo na dobru dicu proč kroza fumar, napunit čizmice,nač bor, ostavit ostatak darov,opet izač kroza fumar vanka, sest u saonice doč do druge kuče koja je u prosjeku udaljena oko 1,24 kilometri iz čega proizlazi da bi privalija ukupan put od 120,8 milijuni kilometri,a za posjetit svaki otu kuču Dida božičnjak ima samo oko tisučinku sekunde vrimena.

Ča je ča ste blenile? A ništa moja Kate,ništa samo ti lipo nastavi tamo di si stala milina te je slušat. Iz navedenoga proizlazi da bi saonice tribale odit 1080 kilometri u sekundi šta je 3 200 puti više od brzine zvuka,a najbrže ikad stvoren svemirski brod Odisej gre 45 kilometri u sekundi dok normalni jelen ide najviše 24 kilometra na uru.
A količinu tereta koji saonice moraju prinit napravili su na račun toga kad bi svaki poklon bija težak okolo 860 grami šta je u konačnici teret od 500000 ton koji saonice od Dida božičnjaka moradu prinit.
Aaaaaaah. A ča je Domina ča si uzdanila?

A ništa moja Kate.Žil Vernu moj toliko si se uživila da te guštan slušat. Ajde pak. Samo ti nastavi dalje.
Za takvi tere t povuč tribalo bi oko 360000 leteči jeleni,a masa tolikoga broja jeleni povečava sveukupnu masu saonic na oko 540000 tona i brzina od 1080 km u sekundi stvara nezamisliv otpor zraka pri kojemu bi prednji par jeleni sagorija s oko 14,3 kvintilijarde đula,a ostatak jeleni njih 360000 izgorilo bi za 4,26 tisučina sekunde,odnosno točno na vrime da Dida božičnjak uspije doč do pete kuče na svome putu.

Ajme meni,pa je li ti više dosta? Evo Marijeta još malo.
Dida božićnjak bi, ka rezultat akceleracije s 0 km/s na 1080 km/s u tisučinki sekunde, bija izložen akceleracijskoj sili 17,5 iljad puti maloga g (gravitacija), tj. 175000 m/s2. Dida božičnjak od npr. mase 115 kg bija bi prikovan za zadnji dijal svoji saonic s 1984906,9 N (newtona) sile, i to bi mu trenutačno smrvilo kosti i organe pretvarajući ga u kašastu ljubičasto crvenkastu tekućinu.

Iz ovog se, relativno trivijalnog, dokaza jasno vidi da Dida Božičnjak ne postoji!
Eto na i to je sve,a ovo mi je koliko san ja uspila zapantit,ča mi je ispričala jedna prijateljica od tetine neviste koja je polusestra čeri od njenoga divera kojoj mala gre u srednju školu di su pri koju godinu na satu od vjeronauka imali ovakvu vrst predavanja. A ča je? Ajme šta ste zinile,zatvorite usta jerbo če me promaja uvatit. Da ča san zinila? Ajde Kate kvragu ti i tvoje predavanje i ča si mi sad napunila ovde glavu sa otiman pizdarijan samo kako bi mi mogla reč da Dida mraz ne postoji.

A je li ti to nas Kate ka zajebaješ? To su učili? I to dica od šesnajst godin su učili kako nima Dida mraza. Filomena nije Dida mraza,nego Dida božičnjak.Ma znaš ča .ebe me se kako se zove je li Dida mraz,Dida božičnjak ili Božič bata ma ča je mašo mašo je.

Slušaj ti Kate ča če tebi Filomena sad reč,oto ime Dida božičnjak je ustvari zamjena za ime o Dida mraza jerbo se je onda kad nas je slipe vadilo iz pečine na svitlo dana, tribalo prosvitlit i Dida mraz iako kapitalistička tvorevina nastala propagandon, smatran je komunističkon tvorevinon koji se ka omiljeni lik dičice nikako nije moga zaobič, pa mu je zato ime prioblikovano iz mraza u božičnjaka.Ajde ti meni objasni,pa da ja to svome unuku koji me to pita mogu reč,da zašto Dida Mraz i Dida božičnjak isto izgledadu,jesu li oni blizanci,a onda i meni usput objasni zašto se ka Dida božičnjak nije izmislija koji novi lik nego su Dida Mraza preimenovali u Dida Božičnjaka i u tu priču je neko uložija toliko truda i vrimena za oto priokrenit? I sad,sad Kate govori da nima ni Dida Božičnjaka?

Da su kojon sričon i o drugiman stvarima tako vodili računa pa danas na ulican nebi imali ovoliko sirotinje koja kopa po kontejneriman za da bi mogli priživit, ne bi nan svakodnevnica bila da ljudi ostajedu bez imovine koja in se cila svela na najobičniju putnu boršu s kojon po cile dane besciljno lutaju spavajuči po parkovima,a jedini krov nad glavon jin je oni kad se od kiše sakrijedu ispod kojega mosta. O tome nije tribalo govorit. Problem okolo Dida božičnjaka je oni pravi suštinski problem oko kojega se triba dobro zamislit.

Je moja Filomena ovo ča si rekla ka da si mene pitala, a ja bi još dodala da prije nego je Dida mraz preoblikovan u božičnjaka bija niko vrime isčeza, tako da mi dite do svoje pete godine nima nijednu sliku sa Dida mrazon. Zaludu san svugdi okolo odila i iskala ga,ma je Dida mraza bilo straj učinit đir da ga ne proglasidu antidržavnin elementon, niti u vrtiče nije zalazija koja je to bila antipropaganda.
Dobro si i ti ovo Mandina rekla učinili su onda propagandu ka da je bila rič o vragu,a ne o smišnomen čovječuljku sa dugon bilon bradon ča nosi darove koji je ustvari najpopularniji lik naše planete.
Domina, Bog iz tebe govori i neka ostavidu bar dicu na miru da dok su dica budedu dica neka dokle moredu virujedu u ono u što očedu virovat.
Ja potpisujen sve ovo ča si ti Kate rekla i nek se odnosi na Dida božičnjaka,a Dida mraz i dalje postoji.

A ti Kate,moreš li objasnit ovo sve ča se događa oko Dida Mraza i Dida Božičnjaka, za kojega očeš reč da sad ni njega nima?

Ma ko če vama objasnit,Vi jednostavno ne morete to razumit.