A evo na:
E dušo,a ča je sričo moja,ovako je iša početak razgovora kad me je moj prijatej Marijo „sekretar“danas nazva. A ča je reč da nisi ništa napisa o onoj večeri u subotu ča smo je činili,a nikidan si o oniman ča itadu plovke jednu trista stranic učinija (odma me napa) E a ča ču ji nego pofalit da je baš dobro kako su se toga sitili,a i ča si se najidija da ni slova nisan napisa,a oli je malo oni videjo i slike koje ono ča se reče govoridu milijun besid. A je,je,ali moga si bija čako i napisat. A moga san bija. Ma je zanimljivo ovo selo,a lipo san nikidan o ovomen pisa,da napisa ja ovako oli onako nikad nevalja,a evo sad kad nisan napisa nikako opet nevalja. I uvik se nađe niko uvriđen,a i ona videja ča ji učinen,ka ča je oni u Vrilan bija opet se našlo nji uvriđeni, i to još sa objašnjenjiman da san ja to njemu za dišpet učinija,a moran priznat da oti niko jema veliko mišljenje o sebi kad misli da san ja oto šenpije od sebe zbog njega učinija. Kad san se uvatija ovega ča ga svi zovedu portal,a sve je samo portal nije,a nije ni blog, pa san ga eto jednostavno nazva medij, „oto“ zamislija ka niku kroniku onoga šta se dogodilo ili učinilo u ovemu našemu mistu,a za da bi nan svima bilo malo ugodnije u njemu živit i ono ča bi tribalo bit učinjeno u ovemu našemu selu i u devedeset posto slučajev ono napisano je razmišljanje ljudi s kojima se svakodnevno susrečen,samo diko obučen u celofan,a diko za da bi koko svatija moraš napisat onako,vulgaris šta kad pojedinci pročitadu odma svatidu ka da je protiv nji upereno,a lipo san gori objasnija,pa neka u budučnosti to više ne mislidu iako znan da oče I ako dođe do toga da iz ovoga ili onoga razloga ne buden moga pisat ovako ka ča san to do sad činija onda ču “ovo” jednostavno udunit.
Nego ajmo se mi vratit nazad o onome o čemu smo ja i Marijo govorili,a oli nije bilo dobro, (pita me)a Marijo, lako češ ti za me i ča ču ti ja reč jerbo znaš da ti neču lagat,ma neš lako za one ča čedu ti reč je,a kad se maknedu koji metar dalje prvome ča ga trevidu če reč nije,a ne moreš reč da se nismo lipo sitili tunbule,pa onda tanburaši koji su lipi štimung učinili ,pa ples sa jabukan…
počeja je on nabrajat, ma je Marijo i bina nije bila na južnu nego na sjevernu bandu,ma ču ja opet reč ka ča i osandeset posto nji govori da je svaka fešta copy paste one druge fešte,a ono malo kozmetike ča se učine ne minja ništa na stvari, npr. baš ova subotnja fešta podsjetila me je na oni film ja mislin da se zva Beskonačan dan (ako nije Filko če me ispravit) to je oni film kad su se skupili za vidit oče li svizac vidit svoju sjenu,a dodatno mi je to sve začinija Elvis ča svako lito dođe iz Jamerik i ka ča se to i lani dogodilo i to baš na isto misto ka i ove godine vidija se sa Majon (osan godin su odili u isti razred) i iščečuka je kako lani tako isto i ove godine i kad san to vidija onda san se odma uvatija smijat i oti momenat san reka da neču o fešti ništa pisat jerbo če se Marijo (s kojin san dilija vrtič, osan godin Osnovne i godinu sridnje škole) najidit kako bi ja to sve koncipira,a nebi bilo u redu da ja omalovažavan nečiji trud,jerbo iza one fešte stojidu dani i dani rada,a isto tako znan da Marijo ništa ne pripušta slučaju i da vodi računa o doti jednoj sitnici, čak san jedan put bija napisa da bi i Kineze doveja da od gruboga oti dan učinedu lipo vrime. I Marijo,najvažnije je da ste vi ča ste u tome onu večer bili zadovoljni i da je sve bilo onako ka ča ste zamislili,a je li moglo bolje?je, moglo je,kad si mi spomenija plovke onda san ti spomenija i one u Drveniku ča su se sitili i na riči iz Grdovičeve pisme nabavili dvi mandoline i i sa rive ji itali u more Jadransko.
Meni je drago da si ti onu večer bija zadovoljan i da ste ka ča si mi reka vas pedeset i sedan od sriče uletili u more i da nije u dvi ure tribalo gledat put kanpanela iako ti to ne bi bilo uspilo jerbo bi doli u dnu uz mene bilo još puno nji ča bi bilo ispreplelo ruke i dočekalo te. I još ništo,skoro pa trečina svita šta je oni dan bilo su turisti,naši i strani,na to si mi reka da nima di niste plakate zalipili i vodičiman rekli da jin rečedu. Eto,ako san čako zaboravija,a ti me opet nazovi…

P.S.
A evo ti na jedna ideja za dogodine. Lipo u ponoča umisto tunbule otu cifru ča je mislite dilit prominite u one od deset kun i lipo itnite sa kanpanela pa ko ča uvati, pa če svi pričat o tomen,a prašina se neče slegnit ni sljedeči miseci,a dica če kad budedu za pedesetak godin zamisto nas sidit na one šentade govorit,je li se sičate oni feeešt kad su se itale one od deset kun? da je li,sičan se kako san povrača koliko san sutra dan sladoleda izija,a ja san napunija muzinu,a ja san…