Ovo kako su izašli rezultati kakvo nan je more (na Gojači zadovoljavajuče) cilo vrime me po selu fermajedu i govoridu da zašto se oto kakvo nan je more ne miri i na Sokolanu i da zašto je napisalo da se oto miri na službeniman plažan,a oli je Sokolana divlja plaža,pa se na nju zato ne miri,(vidi koliko se svita tamo kupa,a vidi oni potok ča izlazi tika uza plažu),a da je li oti ča govori koja je službena,a koja neslužbena plaža zna,da je Sokolana bila prva plaža na koju se svit u selo kupa? na Gojaču su se oni stariji odili mazat sa blaton,jerbo se virovalo da je oto bila ka likarija, itd.itd.,napunilo mi je glavu,a dobro,a ča ja mogu još ućinit?tuč glavon u zid?a oli nisan lani pisa o problemu na Sokolani i onemu potoku ča izlazi tika na plažu,pa isto ka da i nisan,a da je bilo volje,bez puno troška to se fino moglo riješit.

A evo ču na, ponovit oni text od lani,napisan sredinon sedmoga miseca pod naslovon:
PANIKA DANAS NA SOKOLANI

Danas okolo deset i deset na Sokolanu među kupačiman je bila velika panika jerbo su iz onega potoka ča izlazi tika uza plažu kako mi govoridu očevici (biču fin) počela izlazit govna (ka i nikidan i to mi ovi govori +- koja minuta,okolo iste ure ka i danas) i matere su brzo vadile dicu iz mora vanka i beštimalo se u svi šesnajst,a kako su mi rekli odma se je alarmiralo opčinske službe ka ča san i ja zva za vidit ča se da učinit,a čovik je isto tako sve napravija ča je u njegovoj moči i alarmira one ča su navr njega.

Uglavnon ovde triba na brzinu reagirat jerbo ka ča morete vidit na slikan (bocu od cidokora) iz ovega kanala jema bit svašta izlazi,a izlaz je tika uza plažu koja je krcata svita sa malon dicon (vidi sliku) i to od onega stranega i svi stran lipe naše,tako da puno puti oti razni jezici i dijalekti znadu bit u večini u odnosu na nas domače,pa da nebi opet dogodine ka i ovu godinu, kukali kako nan je u odnosu na ovu godinu opet pa broj gostiju,jer nije niko lud pa če se doč kupat tamo di če se infetat,a s ovin danas šteta je več učinjena,ne virujen da če se ovi ča su danas oto vidili više pojavit na ovo misto.

Puno nji se pita okle ova pusta voda iz ovega kanala? A znan da je tamo u Doba mraka kad je jugovinil radija tote izlazija inberlauf-višak vode ča ga jugovinil nebi potrošija pa bi diko tuta force ka danas odila,diko upola manje,a diko je skoro pa nebi ni bilo,ma mi sad nije jasno o čemu se tot radi?jerbo jugovinila odavna nima,a nije vrag da je to oni isti inberlauf i da voda iz vodovoda cilo vrime u ogromniman količinan gre u more?,a ako je i koliko je gre onu gori stranu navr Magistrale,ako ne cilu polak bi se sigurno dalo s njon namirit. Znan da bi sad okolo ovega mogle nastat peripetije jerbo su ovi svi kanali i potoci u ingerenciji Hrvaski vood,ma ništo hitno triba učinit,jerbo nima vrimena za prepiske koje se znadu protegnit,bar nan je ovde tako bilo objašnjeno kad je u pitanju oni potok u Blatima . Možda da Grad ide u pregovore da če on riješit problem tako da bi napravija spremnike i ovu vodu koristija za navodnjavanje zeleni površin u selu na koje se potroši lipo vode,ali ima ništo ča se odma da učinit,a to je da se navr dvorane di ota voda izlazi vanka zamisto prema doli kroz cijev, ota voda usmjeri kanalon koji je napravljen sa gornje bande jugovinilove štrike koji je baš zbog toga i učinjen i kanaliziran tamo u more uza istočnu žicu od jugovinila.

To je rješenje koje je izvedivo u najviše tri dana,triba samo očistit ovi sjeverni kanal od smeča začepit rupu ča gre prema doli i voda če ič kanalon koji je zato i napravljen i izlazit če sto metri dalje nego sad.

Inače san mislija pisat o ovemu potoku jerbo se puno nji bunilo kako je tote more i par stupnjev ladnije nego tamo sa južne bande,kad evo sad ovo.

Na ovoj doli slici di je bila točka je otvor di voda izlazi:

Na ovoj doli slici je to sinjano bilin kolunbaron:

A na ove tri doli slike se vidi boca cidokora ča je doplivala iz kanala i sad se lipo kupa.E.

DRUGI DIJAL:

E ovo je misto di se more preusmjerit voda da zamisto da gre na plažu,kanalon more stotinjak metri dalje:

Na slici vidite kako je stavljen ovi zid ča san ga obiližija su dvi bile točke koji kad ga prije nije bilo onda je voda odila dijal ovin kanalon koji bi diko bija pun do vrja,a manji dijal kroza ovu cijev ča gre do plaže,znači da bi se oti zid triba maknit ili po sredini njega učinit rupu da voda more ič,isto tako iza ovega zida ništo se radilo da voda gre direktno doli tako da bi tribalo gori nalit malo betona da ota voda zamisto doli gre gori i to je cila mudrolija ča se ovoga mista tiče. Inače ovo se radilo onda kad je tribalo cijev od vode primistit zbog izgradnje dvorane i odonda cila voda gre kroza ovu cijev,a ne kanalon.

Na oviman slikan se vidi kanal koji je predviđen za odvodnju vode:

A na ove dvi doli slike žutin kolunbaron je sinjano di oti kanal gre u more:

A sa ovon zanjon slikon tija san dočarat kolika je udaljenost toga mista di gre u more u odnosu na plažu:

Dakle,rješenje postoji,brzo i efikasno,sve je tot,samo triba zasukat rukave!