Kako stvari stojidu ima bit da če se na površinan koje pripadaju Hrvaskin šuman plačat dozvola za vožnju biciklističkin stazan,pa dozvola za korištenje uzletni staz za paraglajding,dozvola če se plačat i za korištenje površina sa popratniman sadržajiman u svrhu izleta,pa če se onda plačat… spisak je malo poduži ma mene sad ovde brkadu nike stvari. Npr. uvatija bi se ja sad našega Kozjaka i Gaja kroza koji je proša put koji je dilon na privatnin parcelan,a večinon na površini od Hrvaski šuum i je li sad oni ča gre gori vozit biciklu mora isto tako platit otu dozvolu? Ili ovo za paraglajdere, sad se koko baci odozgara sa vrja i za oto isto triba platit? Ili ovo, korištenje površina sa popratniman sadržajiman u svrhu izleta? Ka prvo ča je to izlet? Ako ja sad gren uru dvi učinit đir do Gaja je li to izlet? Ili je izlet kad seden npr.na šentadu odispod Sv. Jure šta se more svatit ka popratni sadržaj u svrhu izleta izvadin sendvič i dvojni CE i lipo guštan u spizi okružen prirodon, oču li za oto isto tribat platit? Ili npr.kad drugu godinu bude Sv.Jure oče li oni gori ča budu peč i gradelavat morat najpri platit za to dozvole jerbo gori jema par kameni stoli sa klupan i prostoron za gradelavanje ,a to se isto biče konta ka izlet?
I na kraju kako če se to sve skupa naplačivat? Oče li bit koja ranpa i na njoj čuvar koji če naplačivat? Ili če možda bit koji sa čoperon koji če se po cili dan vozikat i vatat izletnike koji če se kad čujedu motor itat u žbunje da bi izbjegli plačanje? Ili čemo najpri tribat poč u koju kancelariju platit dozvolu za ono ča oti dan mislimo činit pa sa buletinon u žepu poč izlet činit,a ako se koko bude uvatit bez računa onda če mu učinit kaznu?Ili?