Da ča san ja jema odit na utaknicu, da su radi toga i izgubili i da slučajno nisan iša ovo sad kad budedu igrat sa ovin stranin klubon ča če nan doč (neznan ni kako se zovedu),je ja san kriv,ča se naši nisu snašli protiv Dinama i ča se pokazalo da nan je sredina neuigrana,obrana šuplja itd.itd.

Je,istina je da mrzin balun i da ritko kad,gren na utaknice,ali ovi put san jema več koji misec zna da ču na ovu utaknicu sigurno poč,a razlog je ona vrlo čudna izjava o orjunašstvu ča je usljedila nakon one bakljade na Evropskomen prvenstvu nakon koje je priko Ajdukovoga grba na Torcidovomen muralu na Magistrali u Sučurcu prolivena crna pitura i nakon koje su pojedinci kidali iskaznice o Ajduka i Torcide,ka ča su to učinila dvojica iz našega sela i pofalili se s otin na jednoj od društveni mriiž,a kasnije san vidija na ovemu jednome da je doša do zaključka ka da se malo zaletija,ali eto, nije tija dat gušta,nego je protiv nas deset na pazaru u selu branija otu izjavu i oti svoj čin kidanja iskaznice,ali,reka je jedan da se sad vidi ko je ko,a kako je narod to sve primija, najbolji pokazatelj je krcat stadijon,jer se ne panti kad je zanji put sve bilo vako puno,a to je ono ča je jedan bija pita,a šta je to ča Vi zovete Dalmatinskin dišpeton? a to ti je,eto to.

Ma ko more nako navijat,a klub ti gubi četiri nula,ma to niko sa strane ne more razumit,ali,kad je završila utaknica navijači su isto tako dali jasnu i glasnu poruku igračiman Ajduka koji su se posli utaknice došli javit Torcidi i stali su na sjeveroistočnoj strani igrališta i nakon koju možda minutu se okrenili da čedu prema svlačionici,ali,u tomen momentu,kad su se uputili da čedu poč ča,stadijonon se prolomila takva buka hukanja i zviždanja koju ja u životu nisan čuja,nakon čega su Ajdukovci svatili ča su učinili,pa su se onda vratili nazad,priskočili reklame,došli na tartan stazu, isprid Torcide,i stali pognuti,parilo je ka da su došli na kajanje,a od strane navijača ništa,muk,to je bila tišina koja je sve govorila i koju su svi svatili.