A kad je nikidan dnevna tenperatura bila okolo dvajstipet,onda nan opet nije valjalo,a ča bi mi tili,a onda čuješ,a lipo normalnu tenperaturu,npr.do 31 stupanj je super,sve priko je ajme,a evo jutros okolo četiri  ipo,pogleda san koja je tenperatura,tamo di se službeno miri i bila je trideset,taman onoliko koliko si reka,a da neka lipo iden kvragu,fala ti,a ča san sad krivo reka,da ča si reka,dnevna,dnevna tenperatura do trideset i jedan,a ne u četiri ipo ujutro,asti,a oli dan nije od 0 do 24,a pa i oti četiri ipo ujutro spada u dan utorak,pa me opet poslalo,a dobro.

Svaku godinu isto,kad je zima,kad če više lito,a kad dođe lito,e onda,blažena zima,pa onda nan opet punidu glavu o globalnomen zatopljenju,bla,bla,a jema oni ča baš i ne obadajedu šta oni kojima je to posal oba vručinan govoridu-strašidu nas,več kad je vako puno vruče da se ni u moru,di je tenperatura okolo 27 stupnjev,ne moreš rasfriškat,onda u ove vruče dane,kad dnevna tenperatura dosiže i 37 stupnjev ljudi stojidu ispod slapov,a oni koji trenutno ne moredu bit na njiovomen mistu,moredu jin samo zavidit.