Sičate li se lani u šesti misec kad san pisa o novoj atrakciji koju bi Kaštila tribala dobit,a rič je o Maloj Ferati u vlasništvu Ivana Borozana Ike koji mi je još onda reka da triba dobit još koji papirič i da bi onda ferata tribala krenit u vožnju Kaštelanskin ulican?

A  evo nakon godinu daan i dva miseca od otega ča san bija napisa,Mala Ferata je još uvik u fazi čekanja nečega,za da bi mogla počet vozit.

Znači,ode ono prošlo lito,a evo,pomalo,ali sigurno i ovogodišnje lito završaje,a da Mala Ferata još uvik nije počela vozit?

Pa se onda pitamo da zašto svi bižidu ča,a stranci u nas ritko otvaradu biznise,a čovik oče radit,uložija je pineze za da bi niko oto sve zakočija? Zanimljivo je da administracija uopče nima za to sluha,a živi od porezi koje bi plača i vlasnik otega vlakiča?

Ma čekaj malo,a di je to zapelo? A da bi tribalo označit okretišta i stajališta sa crtan i znakoviman? Asti,da su se flomasteriman uvatili,bili bi dosad završili?

A onda mi je jedan ča je iša ovoliko razvlačenje opravdat,počeja objašnjavat niku svoju teoriju o tamo nikome sigurnosnosnome riziku,jerbo liti jema puno svita ča šeta pa tako,bla,bla, truč,trač.

Ma čekaj malo o čemu ti ovde meni puniš glavu,govoriš mi o ovomen ka da je to dvanajesto svjesko čudo.

Slušaj ti sad ča če tebi Tonči reč,tamo u Makarsku,di u odnosu na Kaštila jema jednu trista iljad puti više gostiju,otaki vlakič gre uza  plažu i to puten koji se nalazi u pješačkoj zoni,koja je sa dvi strane okružena,sa štekatiman, kafičiman,restoraniman,dučaniman,pečenjarnican,sladoledarnican,fast fudoviman,vočarnican…

I tote dnevno prođe,sam Bog zna koliko i po nikoliko desetak iljad svita  i oti vlakič bez ikakvoga problema tote prolazi,samo zazvoni ding-dong i svit se na obe bande miče u kraj.

Znači,ako se nezna ča i kako,samo se gre u Makarsku i “copy paste” se to u Kaštila.

Ili se puno dobro zna,ali ja naivan mislin da se nezna ča i kako??

Ovako je to u Makarskoj:

A u Kaštiliman,zamisto da domači i turisti guštadu u panoramskoj vožnji vlakičen,Mala Ferata trune na livadi i skuplja prašinu.
Strašno!!!!