Danas u deset ipo ujutro u zgradi Opčine (Graske uprave) oglasija se alarm za uzbunu i svi ča tote radidu morali su kroza južna vrata (ona podrumska) izač vanka. Naravno, pomalo i bez panike,a onda su po dojavi doletili naši Sučuraški vatrogasci koji su “napali” zgradu sa sjevera,juga i iz unutra. Sve skupa je duralo okolo po ure,a usput kad su vatrogasci več bili tote onda su oprali i onu gori taracu navr ulaza. Cilu ovu akciju,koja je ustvari bila evakuacija zgrade, pratija je i inspektor koji je sve to lipo sinja i zapisa tako da se zna koji su bili nedostaci,eventualne greške i ča za ubuduče triba popravit,a več sad se zna da su zvono za uzbunjivanje čuli samo oni na nižiman katoviman,dok oni na višiman govoridu da se gori ništa nije čulo,pa je jedan usput dokle je izlazija sa gornjega kata doda …, ma neču o tomen. E,a pošto je ovo bila, ka ono,je li, vatrogasna vježba,a o čemu su mogli oni ča su sve to gledali govorit nego o vatrogasnoj vježbi u Malomen mistu di se spašavala imovina i tajni spisi Malomiščanske opčine. Malo misto je stvarno besmrtna serija i svako malo iz otega serijala se puno toga i dan danas ponavlja,neka je snimljeno pri četrdesetipet godin.