Google
337

A ča su ono navijači upali u teren?

Datum:July 20, 2019 11:50 am
Comments
Komentiraj

Bilo je kad smo ja i mala došli doma sa utaknice od Ajduka.
Ma daj di si to čula?A je, eno piše po portaliman,govori Ona i još pišedu da se napalo i svečanu ložu.
„Ma nije to tako bilo,igrači su se od velike euforije zaboravili poč poslin utaknice javit navijačiman,pa su eto,navijači svratili do terena za nji pozdravit.“

Ajme ljudi kako je oto utaknice bilo teško za gledat,pogotovo drugo poluvrime kad se naši nisu mogli sami sa sebon sastavit,bolje bi bili igrali nji deset ča se nako rekreativno na ulici za na balun bacit nađedu,nima ko nije bešima,od oni najstariji,pa do nikoga maloga ča je sidija livo od nas,biče jema nigdi okolo sedan godin,pa ji je onako lipo sočno posla u bip materinu,a otac ga odma ukorija kako ne smi tako,a je li,ja nesmin,a ti moreš,pa ji je mali opet posla,sad na jedno drugo misto,a bilo je i oni ča su i dvadeset minuti pri kraja počeli vanka izlazit,jerbo više oto nisu mogli gledat,a ovi jedan pita ovega drugoga da di če več,kvragu,gren ča,oli ne vidiš di ovo sve vodi,još čemo i izgubit,drag san ja sam sebi,oče me radi baluna srce strefit ,a ovi mu drugi petaje roge,na vraga izija ti i ča čemo izgubit,a eto je falija i zanimljivo je kako je nakon drugoga gola ča su nan ga dali, dokle su sa istoka krenili kontinuirani zvižduci i uakanja,Torcida još žešče počela navijat i sa otin tila pomoč igračiman, i onda sad opet pusta pripucavanja,sad opet po Torcidi,e huligani,kako su ono upali u teren itadu se stolican,a vratimo se malo u prošlost i Velo Misto i onu scenu kad je Ajduk isto tako izgubija pa su ji isprid barake na Plinari čekali,od Spliski težakov,do oni „viđeniji“ koji su se u nji itali stinjan,pa ji je Ferata doša spasit,znači oto nema veze sa huliganstvon,to ti jednostavno tako dođe,evo ja ča mi oto baluna nije baš ništo napeto,isto san popizdija,a ni mala nije zaostajala za menon,to su jednostavno takvi momenti i opet ču se vratit na Velo Misto kad je Netijak vazeja stinu da če gađat suca ča je kreja,pa ga je Strikan ferma,a Netijak mu reka,ti si Strikane kriv,jerbo si me ovde doveja i sad san se naljušija…

I sad če koko mislit kako ja iden ništo opravdavat,ne iden,ali to je jednostavno tako i gotovo.
Ali u ovoj svoj situaciji ča se na stadijon dogodila nameče se logično pitanje,kako se pored pusti zaštitari moglo dogodit da publika uleti u teren,i ča jin znači ona gvozdena ograda ča je uvik postavljadu na „tartar“stazu prema istoku i sjeveru,pokazalo se da je za niku stvar,kako je bacilo na sjeveru,tako je ka domino efekat, svi stopedeset metri ograde na pod palo?

A jesan nikidan iša pretplatu za mene i čer vazest,satrala me lani,koliko je luda za Ajdukon skoro pa smo na svaku utaknicu morali poč,pa smo nikidan seli i skontali,četiri utaknice za kvalifikaciju + ove naše=isplati se za popizdit-ovo mi je jedna od bolji,ako ne i najbolja investicija u moji 55 godin,je,je.

I ča je najgore od svega još san mora u redu dvi ure i deset minuti stat,gren ja tamo na stadijon prema vratiman di se činidu ote preplate i vidin niki svit kako stoji,ovi drugi sididu,biče ovo oni najvirniji ovde vako isprid Ajduka po cile dane stojidu,mislin se ja i gren prema otiman vratiman za uč unutra kad isprid mene niki stoji i u ruke jema niku kartu sa brojen,a ča je ovo,pitan ja,a to je broj kad ču bit na redu i tura mi u ruku oto karte sa brojen 211,asti,a ča je ovo,greš u banku triba ti broj,u likara broj,ideš vidit zašto ti je poslalo veči račun za telefoniju,opet broj,a sad evo ni pretplatu od Ajduka bez broja ne mogu vazest,a kad bi ovo otprilike moglo,pitan ga ja,a tu okolo po ure,govori on meni,a dobro,iša san malo prošetat,nisan daleko,da me ne prođe red,pa ču opet tribat vazest novega i eto mene za dvajstipet minuti pitan ovega ča je izaša koji je,a da je on bija broj 175,asti prošlo je tek petnajst broji,a sad san iša u malo dužu điradu,obaša san okolo i opet se nakon po ure vratija ,sad je ništo više broji opremljeno,asti ovo sad gre brže,ne gren više nigdi,sigurno ču brzo na red doč,pa san osta tote isprid,sa jednon nogon u pitaru,jesan pogodija,uša san unutra nakon dvi ure i deset minuti,sta unutra par minuti i vanka izaša cili ponosan sa dvi škatule pretplatnika 2019/2020,došlo mi je ono ka Mister Binu da jin sa otin mašen isprid fac, ka ono,a vidi ja san vazeja,a vi se ovde cvarite i ča je najgore od svega,ako dođedu na red,jerbo san ja izaša okolo sedan uri i deset minuti,a oni ča je jema broj 257,ka i oni sa brojiman nižiman odo toga,je pitanje oče li du uopče doč na red,jerbo oto radi samo do osan uri,a puno nji je vratilo,jerbo broje više nije dililo,a bilo ji je i iz Osijeka,Varaždina…plakali su da kako čedu sad doma bez preplate doč,pa su ji niki koji su ulazili sa sebon unutra na svoj broj vodili.

Ma nema veze,idemo dalje,ovo je samo jedna od utaknic,a prvenstvo tek počimlje i biče to ok,čak mi se čini da je ovo dobro da ji je odma na početku razdrmalo,pa če tako sad bit oprezniji.Valjda.

Eto,nije dobro ča je u priskakanju ograde jedan momak upa u kanal između tribini i terena,ali sve je u redu,kako se govori,proša je bez veči posljedic.

I kad gubi i kad vodi uvik virni Ajduku svomen.

Ispeci pa reci:

2 Comments add one

  1. ja mislim says:

    razumin torcidu ipak su oni najvjerniji navijaci koji su tu i po zvizdanu buri kisi podrska na gostovanjima…

  2. LiliHip says:

    Povijest se ponavlja. 😀

Komentiraj