Google
2,168

Kontra mraku kontra sili

Datum:November 30, 2014 11:30 am
Comments
Komentiraj

Tako se zva prosvjed kojega je Torcida jučera učinila na Splisku rivu.
Nije bilo uopče razmišljanja okolo toga da če svita bit,ali vidin kako pojedine novine portali i televizije govoridu da je bilo okolo dvadeset iljad,a riva zajedno sa Marmontovon i trg isprid Svetoga Frane zajedno sa Matejuškon su bili krcati i njiman za informaciju bilo je od četrdeset i pet do pedeset iljad svita (ko ne viruje neka pogleda snimku učinjenu iz maloga helikopterčiča). Puno nji se pitalo zašto se je ovi prosvjed učinija u dvi ure kad su ljudi na obidu,a ne kroza podne kad je riva puna svita,a vidiš ti, kad san malo boje razmislija dobro je da su to učinili,jerbo bi se onda oti isti raspisali kako je i tako to vrime kad su Spličani u svomen omiljenomen “dnevnomen boravku” pa bi odma sa otin umanjili ovu brojku s kojon i ovako manipuliradu.

Ali ča je bila glavna strepnja jučera? svi pogledi bili su uprti put neba koje baš i nije puno obečavalo jerbo su se nadvili niki teški oblaci i nima koje se meteorološke stanice nisu pratile od oni Norveški,Američki,Kineski,Cro metea,zvalo hidrometeorološke zavode,kontaktiralo one narodne prognozere,a ja kako san ujutro učinija đir kroza selo naletija san na Pipu,pa ga pitan ka nikoga ča je cili život na moru,ča misli kako če u dvi ure vrime učinit,a on gleda put neba,pa tamo prema Čijovu ginga glavon i govori,dobro če bit ako vako nastavi sa jugon,ali ako vitar ferma i okrene odo tamo(kažije put jugozapada) onda smo najeb… I tako san ja cilo vrime puten gleda u robu na sušiliman je li pirka i tamo nigdi okolo ure ono vedrine i sunce ča se bilo pojavilo opet su nadvili oni teški gusti oblaci,a ja govorin asti evo na,taman če počet kad i prosvjed,ali gledan robu na sušiliman,ginga se i dalje, i najedan put okolo dvi ure manje dvajstipet minuti eto opet sunca i učinilo je lipo, za da bi jedna žena rekla i Bog je uz nas.

Samo bi se ponavlja,jerbo san to več prošlu subotu pisa kad san na stadijonu bija da je ovde na prosvjedu bilo i mlado i staro, svi generacij,muško, žensko,oni koji niti su kad gledali utakmicu,niti ji balun zanima… ovo jučera na rivi se “dogodija narod” i ne stoji ona ka ča nas opet očedu prikazat ka nike redikule,vidi ji,ljudi nimadu ča jist i zamisto da se zbog toga izađe na ulice oni to radididu zbog baluna,a lude ga grada. Nije to baš tako. Kroza povijest Ajduka bili su razni ratovi i ljudima je bilo puno,puno teško i napačeni i srušilo jin i gladni i goli i bosi,težaci su iako satraveni od svoga posla u poljiman napravljali Stari plac i to je od pamtivijeka tako i tako če i bit da kad je Ajduk u pitanju svi dišemo ka jedno,a znan da jema oni koji to nikad nečedu svatit,ma to me nije ni briga.

Inače o tome koliki smo mi ovde, ka ča nan očedu svakako reč da smo divljaci je dokaz i to da su jučera malo pri prosvjeda rivon u svojiman tutan sa natpisiman prošetali igrači Zagreba koji su jučera popodne imali sa Ajdukon utaknicu,a isto tako između ovi slik ča ji morete vidit jema i jedna auta iz Zagreba koja je bila parkirana na ono parkiralište na rivu i di je čovik okolo ure ipo seja u auto i iša ča i niko ga ka ni igrače nije ni taka niti mu-in šta dobacija,a triba naglasit i to da je jučerašnji prosvjed proša dostojanstveno, bez ikakvoga incidenta šta je puno nji priželjkivalo,ka i to da se kasnije nije išlo u masovno upadanje na stadijon šta se cilo vrime imputiralo.

A čekaj malo,šta je ono prošli vikend bilo u Zagrebu kad su tribali Ajduk i Dinamo igrat? Niko je upa u đački dom sa bakljan i tražija Dalmatince? Biče siguro za sa njiman poč piče popit?

5 Comments add one

  1. mudrajko says:

    Malo nas je al nas ima… oni će nas bavat

  2. LiliHip says:

    Do sada kao nisu znali. Sada znaju. Kontra mraku kontra sili!

  3. miritan i ja sta rec says:

    eto smo mi svoje rekli

  4. ja mislim says:

    jesi li ti pechina koji vistac nikidan si sve ovo predvidija i to prvi dan kad je bija docek na stadionu cudno vrlo cudno?

  5. pechina says:

    Dobro mi nisi ka ča zna to @neno učinit insinuira da san i ja tot umišan,nego jesi li počeja kupit grane?

Komentiraj