Evo na,niko je jedva čeka da sve prođe,a jema i oni ča bi volili da se ovakvi događaji bar tri, četiri puta godišnje dogodidu. Ma ko bi nama udovoljija,podiljeni ka i uvik. Nikidan doli na dnu “Mramontove” karadu se muž i žena,ona če, ajme ma vidi ove sodome i gomore,a muž če a di?ma ča di,vidi, kako šetadu goli ovi stranci?,a ja ne vidin nikoga gologa,nego u kostimiman,a tebi je to ka normalno?pita ga ona, a ko je tebi i meni kriv ča smo ostarili pa nan,ne nan, nego tebi sad to smeta,ajde kvragu ti i ča meni smeta jerbo san ostarila,jednostavno se zna red i ne gre se gradon vako gol,a meni je baš drag ovaki kako ga ti zoveš nered i ča se mene tiče svi mladi moredu gradon u kostimiman šetat. E. A kasnije su krenile i teške beside i lipo su se oni tote iskarali tako da je posli toga iša svako na svoju bandu.

A i opet se doli na Splisku rivu di sididu penzijoneri moglo čut o onemu šatoru s kojin bi se Split pokrija i naravno, ča je Miljenko Smoje reka o največemu cirkusu na svitu.

Ma zanimljivo je to kako se ovi mladi svit,popularno nazvan partijaneri, očedu prikazat ka nike divljake,pijandure…,a niko ka ne vidi svakodnevno ponašanje mladi koji u određene ure gradon šetadu sa bocon ili onon malon plastičnon demijanicon od dvi-tri litre vina i di se sastajedu na određeniman lokacijon u srid i izvan užega dila grada, pa se tamo opijedu? To nije problem?

A nima koje vire i kulture iz svakoga kantuniča svita ove dane na stadijonu nije bilo prisutno,nji stopedeset iljad iz sto i četrdeset zemalj i po tome su tribali bit neredi epski razmjeri,ali nisu,mladi i neopterečeni su i ovi put pokazali onima starijima kako bi se tribalo ponašat,a možda to kome i smeta, jer ji ne more stavit u nike svoje okvire,vako jin razbijedu koncepciju koja se nikako ne slaže sa onon ča su je tamo niki-tamo nigdi, zacrtali?

Naravno i dalje jema oni koji Ultru očedu na sve načine omalovažit,pa znadu reč,a kakve mi to koristi od ote Ultre jemamo,vidi pustoga smeča kojega učinidu,to nan od Ultre ostane,a je dobro su oti rekli,učinilo se u ova tri dana nigdi okolo sedandeset toon smeča,ali nikako da se sitidu one izreke, da se po količini smeča zna koliko ko jema pinez,oni siromašni ga ne činidu puno,a koliko ovakva manifestacija znači, ne Splitu,nego ciloj Hrvaskoj, vidi se po protoku pinez, računa se da se u dane od Ultre okriče okolo pola milijarde kuun,a reklama i povratak ovi mladi ljudi nazad u Hrvasku, ka obični turisti da i ne govorin. Dokle če Ultra još ovde bit ovisi i o svima nan,koliko nas ko jema,ali čovik tek kad ništo izgubi vidi da je falija i onda bi da more, vratija vrime nazad i napravija drugačije,ali to kako znamo ne ide tako. Tribali bi se najpri sami između sebe dogovorit ča bi mi ustvari tili? Ali to kad dođe na red,tek smo na 41 i 45-toj.

I na kraju,moran reč da je ka po običaju, ova tri dana okolica stadijona bilo kultno misto na kojemu su i oni ča odobrajedu,a i oni najžešči protivnici, tili bit dijal toga šušura tako da su se tote mogle vidit konpletne familije kako šetadu isto ka da su na rivi,a i oni poodmakle dobi šotobraco su odili,svako malo se fermavali i glavon gingali.