Google
1,170

Adijo naša Sučuračka „Dujo“

Datum:May 5, 2019 10:50 pm
Comments
Komentiraj

Picture 1 206

Šta se to dogodilo sa Sučuračkon  „Dujon“?

A ništa, nakon dugi četrdeset i četiri, pet… godin Sučurani su uspili ostat bez nje.

A bilo je i prije pokušaji,pa se bilo govorilo da če iz Kanbelovca odit,mislili su je i ukinit,ali je ondašnja Mjesna Zajednica bila tvrdi orij,pa su odo toga odustali  i ostala je do današnji daan,je da je maklo na drugu točku polazišta,ali je i dalje ostala Sučuraška „Duja“.

Fermajedu me u selu da kako smo to mi iz Mjesnoga Odbora izglasali da nan „Duja“ iz sela gre ča?

A ja cili u čudu,ka prvo san mislija da me zajebajedu da „Duja“  gre ča,kad ono pročita i ja,je gre,uzelo nan je.

A ja ka niki viječnik tamo nikoga Sučuračkoga Mjesnoga Odbora niman o tomen pojma?

Zoven Željana,kolegu viječnika iz MO-a,biče on zna?On je i viječnik u Graskomen viječu,pa sto posto zna? E Željane,a ča ti znaš odo tomen da nan je „Duja“išla ča iz sela? Nezna ni on ništa.

E,a sad se vračan na ono ča mi govoridu da smo mi iz Mjesnoga Odbora donili odluku da „Duja“gre ča,a ma nismo mi o „Duji“ama baš nikakvu odluku donosili,niti se “Duja” spominjala, nas se pitalo jesmo li mi za to da se uvede nova linija koja bi tribala odit Magistralon,jerbo se zanji tridesetak godin gori naselilo puno svita,a naravno da jesmo i to smo jednoglasno izglasali.

Znači niko je turnija krivu informaciju.

A ova vijest o „Duji“ ča je nakon četrdeset i četiri-pet-šest godin napustila Sučurac je kako vidin po pričama u selu veeeliko iznenađenje i postavlja se pitanje zašto se do zanjega ova informacija tajila?

Radi toga jerbo bi mi,bar oporba, iz Mjesnoga Odbora, sigurno tražila hitnu sjednicu MO-a i Zbor građani o ovoj temi,ali oni u Gradu se i tako okolo toga nebi baš puno uzrujali,jerbo san ja i za Sokolanu tražija hitnu sjednicu Mjesnoga Odbora,pa od nje ništa,a nije puno prošlo od toga moga zahtjeva nego dvadeset daan,a presjednik MO-a nije mi niti uspija napisat,oče-neče,ili možda da skuplja informacije pa če onda sjednica,itd.,ča oče reč oglušija se na moju emajliranu poruku,a u selo na rivi isprid nji par san ga pita je li je dobija,da je, reka je.

Toliko o radu Mjesnoga Odbora.

Znači ne more sad niko reč da san ja protiv toga da se i Magistralon gre javni prijevoz,jerbo bi protiv toga samo mogla budala bit,ali san protiv toga da se je za to iskoristila „Duja“.

Ka ča san to več na početku bija napisa, ondašnja Mjesna Zajednica tamo sredinon sedandeseti godin prošloga stolječa „Duju“ je dovela u Sučurac. Znači,niti je to napravila ondašnja Skupština opčine Kaštila,niti Grad Kaštila,več Sučuračka Mjesna Zajednica i to u vrime kad je Sučurac jema skoro pa dvi iljade manje stanovnika nego danas,a danas kad nas jema puno više niko je zaključija da nan „Duja“ više ne triba,a nebi ja sad ovde volija da buden u pravu,ali mi se sve čini da če vrime pokazat kako se ovo nije tribalo učinit,kako je ko veliki priliv stanovništva u Sučurcu,tako je i u Trogiru iz kojega kreče Trideset i sedma,ka i u donjiman Kaštiliman kroza koje prolazi dokle do nas dođe,a znalo se dogodit da zbog prinatrpanosti Trideset i sedma ne ferma,pogotovo u frekventne ure pri početka škole,ali se zato jemalo „Duju“,koja bi to sve pokupila,a sad se dogodilo da Sučuračke stanice kraj škole,na Gospici,na Lučici,na fabrici,na Brižinaman ostajedu bez toga dodatnoga autobusa „Duje“.

I neka mi ne govoridu da če sad bit slabiji pritisak jerbo če dijal odo ti putnikov kupit autobus na Magistrali,dijal oče,ali opet ču naglasit kako se u Sučurcu potriba za  „Dujon“ pokazala tamo sredinon sedandeseti godin,kad navr Magistrale nije bilo svita ka sad,jer je glavna expanzija izgradnje navr Magistrale počela jema tridesetak godin,a isto tako nije zanemariva ni expanzija izgradnje i između Kaštelanske ceste i Magistrale,ali dobro,neko se ka i puno puti do sad u Kaštiliman sitija od nečega šta je prije ne dobro,več odlično funkcioniralo napravit ništo novo,nikako da oto staro ča je dobro funkcioniralo ostavidu na miru,i sitidu se sami ničega novoga,bez diranja u ono staro,odma mi padne na pamet to ča su od ceste uz more kroza Kaštila zbog parkirališni misti napravili jednosmjernu ulicu,pa se zbog toga prema donjiman Kaštiliman biciklisti ne moredu vozit uz more (a tili bi turizam).Sigurno su ponosni.

Evo npr. jedna ideja,kad več ti autobus šta če vozit Magistralon i put nizdol i put uzgor skrečat prema Strabežniku za skupit putnike, zašto se onda ne bi spušta kraj Lidla i skuplja putnike kraj škole i kraj stare stanice „Duje“ i kraj vatrogasac se penjala na Magistralu,tako i  u povratku,jer između na Magistrali i tako nima nijedne stanice.

I na kraju jesu li napravljeni svi preduvjeti za da bi sve bilo kako triba,je li ko razmišlja o postavljanju ograde na sredini između dvi trake u blizini autobusni stanic(visina 2 metra),jer če kako se ko pritrčaje Kaštelanska cesta za uvatit autobus,isto tako pritrčavat i Magistrala,samo šta su na Magistrali u odnosu na Kaštelansku cestu četiri trake i vozidu se puno veče brzine.Mislite da govorin gluposti? Pogledajte malo u Vriliman kako se prilazi priko Magistrale,pa onda u Čelinama…

Ovo nije ništa novo,zbog takvoga pritrčavanja stavljene su ograde na Smokoviku,od Pujanki prema centru… ništa  nije skupo kad usporedimo sa mogučon tragedijon.

Ispeci pa reci:

4 Comments add one

  1. mudrajko says:

    Ode legendarna Sućuračka duja. Fala joj za sve one momente šta smo u njoj proživili.

  2. ja mislim says:

    Neka su nan je uzeli to smo i zasluzili

  3. LiliHip says:

    Kako riješiti problem? Lijepo,”zagrabi”u Sućurac!

  4. miritan i ja sta rec says:

    stavite i zgradu od opcine na kola pa je nosite ca

Komentiraj