Eno je Filko napisa da sad kad su svi o maškaraman rekli ono ča su jemali,onda je on da ga se nebi kopiralo, tek sad na svoj blog napisa.
E moj Filko,pa region je po svemu onomen ča mogu vidit tek počeja i ko zna kad če o našiman maškaran prestat pisat.(a kad si več spomenija to o kopiranju,onda ču ti reč da Marija više ne zoveš sekretar o maškar,to je moje,ti izmisli svoje)

Nisan ništa mislija pisat,jerbo kako to več ide, počmedu o tebi govorit ka čudaku koji se sa maškaran kara,pa san samo meka slike bez ikakvoga texta,ali nakon ove velike bure koja je posli održani maškar u subotu podigla region na noge,jednostavno moran i ja čako reč.
Najpri bi napisa ništo na ono ča je izjavija Drago Pilsel koji je paljenje krnje sa kako je on napisa, likom Milorada Pupovca u Kaštel Sućurcu shvača zabavon maloumnih fašista koje bi sve do jednoga tribalo bacit u more, iako on ne viruje u njiovo otrežnjenje.

E pa poštovani Drago Pilsel, u Narodnooslobodilačkoj borbi sudjelovalo je 444 stanovnika Kaštel Sučurca.
Ne triba naglašavat da je to bila antifašistička borba?
U borbi je poginilo 79 Sučurani,a ka žrtve fašističkoga terora i ratnih stradanja
njih 110,imali smo i petoricu nosioca „Partizanske spomenice“,kroz razne logore,zatvore i internacije prošlo je 450 Sučurani,šta znači da je svaka familija u Sučurcu i te kako okusila „čizmu“ fašističkoga terora.
A mi,kako ste nas ono svatili?Ka maloumni fašisti,smo potomci od tih ljudi.
Vi ovo sigurno niste znali,pa san ja eto smatra da ove podatke triban napisat.

Ova vijest o paljenju krnje u liku,kako oni govoridu Milorada Pupovca i igrokaza u povorci o napadu zvezdinih igrači na Spliskoj rivi je žestoko odjeknilo,pa je tako bilo i u vijestiman na razniman televizijan,portaliman i novinan kako našiman tako i srpskiman,koji se natječedu (ko če dalje pljunit).
Ka npr.opis da su Sučurani sa scenom napada na Zvezdaše od koji se jedan bacija u more uz pismu čulo se buč bač boč, zapanjili javnost i to uz opasku kako je gomila bila oduševljena i postavlja pitanje zašto?

Pa ja ču odgovorit zašto,a zato jer je to bija skeč,a po ovome napisanome,znači da bi sve komedije,tragedije drame koje se prikazijedu u kazalištiman ili filmove koji su snimani o razniman događajiman i likovima tribalo zabranit?

Srbijanski ministar Vanjski poslov Dačić, je još iša i korak dalje,pa je reka da ako se od pokušaja linča izrodija igrokaz,triba li onda strepit da bi „šala“ sa spaljivanjen lutke kako je on reka-Pupovca,mogla bit generalna prova za nešto šta se sprema njemu kao lideru Srba?

Ovo je več bilo malo zločesto. Nije mi jasno odkud Dačiću takva insinuacija,možda je njemu tako ništo cilo vrime u podsvijesi,ali ja ga, ča se tiče insinuacij o našima maškaran i njegovomen bolesnomen naumu,moran odma demantirat i reč mu da je,od dosad zapaljeni osamnajst krnji u našemu selu,nji dvanajst bilo živuči osob,kojima nije pala ni dlaka s glave.

Tokon dana javija se i sam Milorad Pupovac koji je reka da je to bija čin nesretnih ljudi,sredine i društva koje nikako da se suoči sa sobom.

Pa je nastavija, to društvo nikako da se upita,a što sam ja učinio da mi ne bude tako kako jest i jesam li i malo kriv za to kroz što sam prošao,za to što se dogodilo?Ta vrsta suočavanja nije se nažalost dogodila.
Ovo gori napisano nebi komentira,neka to učini svak za se.
Ili natpis koji san nigdi vidija di piše,da skandal bude veči okupljeni su s odobravanjem propratili spaljivanje lutke-krnje,uzvikujuči Pupovac se pritvorija u pepel.

E, a ja sve one ča nan očedu nametnit niku krivnju da smo mi sa odobravanjen popratili paljenje kako govoridu Milorada Pupovca,moran debelo razočarat,jerbo Van moran reč da velika večina okupljeni uopče nije imala pojma čiji lik krnje predstavlja i kad su ga užgali na svakomen kantunu se vodila debata,ko je oti krnje?
Pa su onda otvarali Mašogadure za vidit je li unutra piše,ali nije,tako da je svako jema svoju priču i baš fala oviman ča su mi otvorili oči pa sad znan ko je, tako da više ne triban o tomen razbijat glavu.A moran reč i to da san zbog slikavanja bija prisutan tika na licu mista i nije mi jasno okle ovomen ča je pisa, podatak da smo uzvikivali Pupovac se pritvorija u pepel?

Vidiš ti ča geni činidu. I tamo nigdi sedandeseti godin Sučurani su jemali barufu okolo krnje,kad su činili lik željezničara-skretničara u uniformi, koji je kako govoridu, parija ka lik od Tita,pa su tako ondašnji ljudi iz maškar nakon paljenja krnje pozvani na obavijesni razgovor,ali sve je dobro prošlo,milicija nije dejstvovala.

I sad kad ovo sve vidin neznan bi li se smija oli plaka? A sičan se tamo početka devedeseti godin kad se govorilo da nan nečedu oni sa istoka više govorit ča čemo činit,a vidin ja da nan i dalje govoridu,a uz nji sad jemamo i one sa zapada ča nan isto tako govoridu šta bi tribali činit?

I vidin kako sad Srpska diplomacija čini pritisak na našu da ništo moradu poduzet,a nije valjda da čemo sad vidit i kojega našega političara koji če ovo sve skupa osudit?
Najbolje je da donesedu neki zakon o maškaran u kojemu če pisat,ča maškare smidu,a ča ne smidu pisat, činit,užižat,govorit…

A sad evo ove dvi doli slike o kojima san govorija,na ovu prvu ljudi nisu bili na čisto o kome se radi,dok su ovoga na drugoj slici,ča nije zapaljen, svi pripoznali.