Google
351

Maškare u našemu selu

Datum:February 14, 2021 11:30 pm
Comments
Komentiraj

Jučera su,kako to inače ide po rasporedu u našemu selu bile maškare,ka ča je sve drugačije zbog ove nesriknje korone tako su i maškare bile siromašne sa točkama,jerbo ne smi na okupu bit puno svita,a i nisu išle sa pilane,več je ovi put to bilo sa Sokolane i ka po običaju završilo sve na Mujal di je zapalilo krnju.

Naravno,pošto nas je zanju godinu daan izludalo sa ovon boleščinon,koju pratitu razno razne teorije zavjere,sudionici povorke su bili u skladu događanji koje smo u ovi godinu daan mogli zbog toga vidit i doživit,pa su tako selon prodefilirali vježbači,koje su budnin okon nadgledali oni iz civilne zaštite,aludirajuči na to da se u doba korone ni sa sporton kako triba ne moreš bavit,pa smo mogli vidit i civilnu zaštitu koja piše ljudiman kazne,zbog samo njiman znanih razloga,jer vidimo da pravila za svi nisu ista,(i meni je ova jedna iz civilizovane žaštite uručila kaznu)pa smo onda mogli vidit one ča su na bile monture imali natpise volonter civilne zaštite grada Kaštili,šta je objašnjeno na način,da kako volonter za svoje volontiranje more bit plačen,a koliko je plačen,prikazali su sa po sebi zalipljeniman Starčevićiman,to su one od iljadu kuun,a cifru sami izbrojite,jerbo ji svako na sebi jema baš onoliko koliko triba,pa je onda bila točka pod nazivon Bris anusa,parodija na one ča su se sitili da bi oti način bija najpouzdaniji za briseve uzimat,a prikazan je na vrlo zanimljiv način,onoj osobi kojoj se uzme bris da se da oti isti štapič sa sadržajen pomiriše i ako čuti vonj onda je dobro, bris je negativan,pa onda sad dolazimo i na krnju,a krnjo je bilo jedno geometrijsko tijelo poznato ka piramida,a na njoj su bili nacrtani isprepleteni šestar i škvara,pa oko u trokutu,napisana imena od razni štanpi i televizij,slika od nikoga, kako su rekli Bilija, kojemu je navr glave bila inekcija sa cjepivon,a okolo toga svega su išli ona dva aje to sa natpisiman “Slobodni zidari” sa šestaron u ruci,a ovi jedan iz publike je pita ovega drugoga da zašto kad su ovi več napisali da su zidari,zamisto otega šestara ne držidu lopatu,oli mistriju,ne mišadu melo,ka da nikad nisu zidara vidili…

E i onda se sve to skupilo na Mujal i zapalila se ota piramida,sa otin svin ča san nabrojija da je na njoj bilo,ali nije se baš dala,iako je polilo da ča boje uvati, lipo je vrimena tribalo da se užge,a na kraju,ka da su koje nevidljive sile uplele svoje ruke,do kraja oti krnje nije niti izgorija,nego ga je ništo odvuklo u more i cila jedna stranica je ostala cila,e pa se onda oti ostatak mora brže bolje iz mora vadit vanka da ga ona buretina ne odnese u Slatine i onda oto rascipalo,ostaci koji su tinjali udunili vodon i odnili ča.

Eto,tako Van je to bilo,a za one ča me šaljedu kvragu kako nisan ništa napisa oba tomen kako če maškare bit,ču reč,aha kako neču,oli san lud,pa da mi prišijedu etiketu,promotorskoga bioteroriste i nabijedu na nos neku od krivnji koja če jin onako, trenutno past na pamet…

Ča se tiče onoga ča bi tribalo bit satirični list-Mašogadur,morete ga nabavit u frizeraju Zlatko i trafiki Grgur.

A ovako je to bilo sa krnjon koji je uletija u more:

 

 

 

Komentiraj