Za onega ča mi je, dokle san se vrtija okolo kanpanela i slikava detalje, prisutniman okolo sebe govorija,ma vidi redikula,bi poručija,evo je redikul, u odnosu na toga i slične njemu, našiman “vertikalaman”,po kojiman cilo selo more u anbis propast,slika ono ča more i otomen ka i oniman uz njega sa kanpanela past na glavu,ali šta češ,njima je posal po meni pljuvat,jerbo jin je oto zadatak.
Ali neču sad to,o tomen ču uskoro cili text posvetit.

Evo na oviman doli slikan se more vidit kako se na istočnomen luku odvojila jedna stina,pa bi tribalo reagirat za da nan u selo ne bi Andrija Jarak sa lica mista se dolazija javljat.
Ka ča znate lani san u četvrti misec pisa o mogučemu raspadanju našega kanpanela,vidin da se to nije baš uzelo za ozbiljno,pa san to opet ponovija pri petnajst daan,biče se manilo rukon,ah,ma pusti ga, opet oni redikul ništo po svoju,oče se pravit pametan,a biče zanimljivo vidit ča če se sad dogodit,oče li i na ovo manit rukon.

Malo čudno je da se je ova stina makla iz ležišta,jerbo je ka i ostale učinjena na konus i samostalno stojidu u luku,tako da je čudno da se ovo uopče dogodilo,ali bi to moga bit pokazatelj da je kanpanel možda učinija “škerac”. E ovo nisu moje riči,ja za ono ča ne razumin pitan one ča znan, da o tomen znadu više od mene.

Vidite razmak na ovemu vijencu doli na sliku,sad mi je ovo reka jedan drugi ča se razumi,mala je vjerojatnost da su, kad su kanpanejal činili, ondašnji meštri baš toliko falili i ovoliki razmak učinili,pa se možda stvarno radi o gori spomenutomen škercu?

A na ovoj doli slici se vidi kako je to knap učinjeno: