Nakon šta je Grasko viječe Kaštili jema biče misec ipo-dva donilo odluku o odvajanju smeča, kroz Kaštila su se pojavile ovakve kante?

Jema več i skoro pa če i misec daan da se po Kaštiliman mečedu nove kante u koje iskričemo ono malo smeče,ča ga učinemo kroza šetnju,npr.kartu u kojoj je bila zamotana krafna,koru od kumkvata…,u Donja sela je to več poplava odo ti kaant,jema ji na svakomen kantunu,dokle je ovde u naše selo jema petnajst daan meklo samo jednu,doli na rivu di je  pješački prilaz kraj crikve i to je to,niko je reka da pari ka probni balun.

E i di je sad tote problem? A u tomen ča smo jema par miseci u cilu Hrvasku ozbiljno zauzeli stav,donile se razne uredbe, pravilnici u kojiman se spominje kako građane triba educirat o odvajanju smeča,u početku če se oni nesavjesni upozoravat,a posli če oti isti nesavjesni zbog neodvajanja plačat masne kazne??

A pa mene sad interesira,ako se več tako ozbiljno krenilo sa otin odvajanjen, kako se dogodilo da se sad mečedu ovakve kante u kojiman tako nešto nije moguče?

Osin tri rupe ča ove kante jemadu di se moredu turnit boce,još samo imamo jedan veliki otvor u kojega se more bacat sve ostalo?

A znan,sad če se koko sitit pa reč,ma vidi ga, ča je sad naša,a ča bi on tija?

A ništa ja nebi tija,ako se več “igramo” odvajanja,a onda ga činimo kako triba. Kako? Ne triba izmišljat teplu vodu,samo triba radit nako kako to radidu oni koji to več odavna činidu.

Evo npr.ovu doli kantu ča če te je vidit slika san u Ljubljani,odma u startu se odvaja sve ono ča se triba odvojit,pa su tako mekli kante sa tri otvora,plavin,žutin i kafenin.