Da ja pišen kako se na Gojaču ulazi sa autan i da sad zbog toga ne moredu dobit ključ?
Vratimo se malo nazad,točnije pri pet dan kad su na Gojaču mekli na stredinu oni stup i malo dalje lanac tako da se sad ne more sa autan unutra ulazit,(motoriman i dalje more),a to su učinili jerbo one meškinjaste ranpe ča su ji mekli naza trideset i šest dan nisu učinile svoj posal za koje su postavljene i u to vrime samo par dan su bile nauzgor,a ostalo vrime su cilo vrime bile spuštene. Zašto su bile spuštene i ko ji nije zaključava niti znan niti me briga,ali znan siguro da san napisa,citat-“Postavio:adminDatum:May 24, 2015 11:44 pm
Od kako su jema dvadesetak dan mekli one dvi ranpe doli na Gojaču cilo vrime je jedna spuštena,lažen,naza petnajst dan okolo tri ipo-četiri u petak popodne je niko to zaključa jerbo je bila nika večera i tako je duralo sve do ponediljka ujutro kad je opet ova jedna spuštena doli i cilo vrime do danas je tako.Triba pofalit ribare i torcidu,jerbo od kako su meknute ove nove ranpe iako je jedna cilo vrime spuštena niko od nji nije uša ni sa auton ni motoron.”

I zanimljivo je da mi je ono gori ča san na početku napisa upravo reka čovik iz Torcide,na što san ja njemu reka da sve ča san ja govorija more pročitat šta san ovde napisa i to je to,jerbo ja nisan od oni ča jedno misli,drugo govori,a treče radi i šta je najbitnije ne minjan mišljenja i ono ča san reka naza miljun godin i dan danas stojin odizad toga.

Neznan kome to triba,ali po ovomen svemu dobije se dojam da je niko turnija priču da zbog mene sad niko ne more dobit ključ
od onega novega stupa i lanca,a poručija bi tomen,ako je to istina da je reka,da je to huškačka retorika koja za sebon more imat i posljediic pa bi bilo dobro o tomen razmislit da ne bude kasnije,a nisan ja zna da če to tako bit. I kako mi je ovi reka, da ako kojoj udruzi ča je smištena na Gojači za da nebi nosili na ruke triba uč unutra moradu zvat predsjednika MO koji če jin doč oključat? Malo smišno je ovo,jerbo oče li predsjednik MO bit tot za oključat jin kad bude njima za oto tribat? Po meni svi koji su tot tribadu imat ključ,ali naravno, tribadu se znat pravila kad i u koju uru če auta ako zatriba unutra moč uč. (Znači sad ključ nimadu ni Torcida ni ribari,ja pita),a zanimljivo je da kako to morete vidit na slikan i dalje kroz jutro ča san ja trevija dva puta morete vidit da je lanac skupljen i stup spušten?Kako?

I još ništo na kraju i to vrlo važno,ovi lanac bi tribalo pod hitno skinit ili na njega meknit nešto široko upadljivo jerbo se u priču uplelo puno sudionici i došlo se do zaključka da je ovi lanac vrlo opasan jer je neuočljiv i more doč do teški posljedic ako koko ili sa biciklon ili motoren bude na njega naletija. Sitili smo se odma događaja iz naše mladosti kad je jedan iz našega sela sa narančaston Javon uša na Gojaču (pomalo je vozija) i kad se vrača nazad niko je podiga sajelu koja je bila spuštena (sajela je bila baš na ovemu mistu di je sad lanac)i ovi se na nju nasadija,sriča bez posljedic jer je sporo vozija i iza toga se došlo do zaključka da je sajela opasna i nalili su skalinu koja je sve do naza par godin tote stala i više nijedan motor nije moga tote proč.