Zvalo me danas sa svi stran da neka gren doli na Sokolanu vidit ča je sve izašlo iz onega kanala ča ulazi na plažu,pa mi je inpoštalo i sliku,a pošto se na slikan nije moglo razaznat o čemu se radi,kad san doša u selo iša san ča to doli vidit i evo ču i sa Vama podilit ovu lipotu od nikoga pustoga perija,govan,uloškov, karte od zahoda,krepane maške i ko zna čega svega u tomen je još bilo.

Ka ča znate o ovomen san problemu sa gradonačelnikon Ivanovićem na licu mista razgovara i ka ča mi je reka,posla san mu i emajliranu poruku sa mogučin rješenjen i popratnin slikan,pri petnajst daan,ka ča isto znate,po tomen pitanju san se gori di se potok vidi kraj jugovinilove štrike naša sa dogradonačelnicon Bosančić,dogradonačelnikon Benutićen i upraviteljen vlastitoga pogona Čagljen i evo ču kopy paste jedan dijal, ča san u tomen textu pod naslovon “Na licu mista kraj potoka”
napisa: “E i eto sad onega famoznoga,(ali), upravitelj pogona Čagalj reka je da se to ne more radit jerbo da je oto o Hrvaski vod i da bi oni to tribali napravit,a ča bi to tribali napravit? zar za očistit oti kanal triba nji zvat,ne more grad?ne more kad je njijovo,a dobro,a kako je onda kad se pribacala cijev od kanala zbog izgradnje dvorane to radija neko drugi,ne oni,dobija san odgovor da je grad nji pita je li moredu to radit pa su jin oni dopustili,a dobro,a oli grad ne more sad pitat i za ovi kanal? e,(ali) sad eto drugoga problema,upravitelj pogona Čagalj,sada salazi doli do kanala i govori kako oti kanal nima gabarite za primit otu vodu (dubina 50cm – širina 1 metar)? a kako nima kad je otin kanalon ota voda i prije odila,pitan ja? ne,ne,ovi kanal nije dovoljan za količinu vode koja dolazi i to je to,ma čekaj malo (ovo ja sad dokle pišen razmišljan) ko je to od nas jučer koji smo tote bili moga doč do zaključka da oti kanal nima gabarite za skupit otu vodu? niko,ljudi tučedu velike škole za take proračune činit,tako da mi je ta brzinska izjava bila malo čudna,ali eto,bar san dobija odgovor da če se ništo provat učinit,a šta vidičemo…”

E, a sad ču Gradonačelniku Ivanoviću poslat novi mejl,sa najnovijiman slikan sa pitanjen ča su stručne službe grada po ovome pitanju do sad napravile,koga se pismeno kontaktiralo po pitanju ovoga problema, Vodovod,Hrvatske vode…jesu li možda stručnjaci od ti firmi izašli na licu mista i koji je njiov pismeni odgovor oko mogučega rješenja ovoga problema…?

Pa ču onda svekoliko pučanstvo o tomen pravovanjano izvijestit.