Jema koji dan da mi je (reka-la je napiši jedan visoki izvor) reka-la da če se doli na Sokolanu,tamo iza košarkaškoga,pa tamo nigdi do žice- ograde od jugovinila radit, nazovimo “šetnica”. Činit če se šetnica? A ma jeli ti to mene zajebaješ? A kad san te ja zeza-la,a neznan ča bi reka,ovo su brzo u nas lokalni izbori pa da ko komen ne gre noge zapinjat? Slušaj, to ti je to,a ti sad provjeri.

Provjerajen,ja provjerajen,provjerajen i dalje provjerajen,a niko nima pojma,svi sliježedu rameniman i ovi jedan ča bi ka triba znat,koji mi uvik reče, da kako ja mogu o selu pričat kad nisan u žiži, nako ka on,ni on ništa nezna,da prvi put eto, od mene sad čuje.

HM,šta sad?jema bit da san blizu onega da ovi unutar stranke ništo između sebe jedno drugomen podmečedu?

Kad,doša do osobe koja nima veze sa politikon,a po informacijaman kojiman barata san vidija da ništo zna,pa san tako dozna da če se ota takozvana “šetnica” stvarno radit,a da je za potribe toga na licu mista izaša i Joe metar koji je piketa dokle je zemlja od vlasnikov ove parcele šta je odma na početku,a koju če oni ogradit,pa je kako morete vidit na prvoj slici razmaknuta zemlja ča su je vlasnici tote iskrenili da se priko nje ne gre.
Ali,opet ja ka nevirni Toma sumljan u oto,jerbo,a pa zar u ovemu našemu selu nima ništa trenutno prioritetnije (a ima) pa če se pinezi umisto tamo, u otu “šetnicu” usut?

I sad,bilo je to u ovi petak,vidija ja isprid nestora jednoga našega iz sela koji često sa društvon zna u kafiču kafu popit i uša š njin u priču da jeli on čuja čako oba tomen,čudi se i on,sliježe rameniman,da niko ništa oba tomen ne govori,kad eto ti Željana Jurlina,ka da ga je sami Bog posla,e Jurline,a reci ti meni kako mi ništa nisi reka oba tomen da če se u selo, doli na Sokolanu “šetnica” činit?,a on cili u čudu da koja šetnica?,a sad meni opet sumljivo,jerbo on nezna,pa mu govorin,a koji si ti to član od Mjesnoga odbora pa da oto neznaš i oli se tako ništo nije najpri tribalo na Mjesnomen odboru iznit pa onda ič dalje? a da on sad prvi put od mene oto čuje.

I dokle smo mi sad oba tomen raspravljali,eto ti još jedan nan se priključija,a ni on ništa oba tomen nezna,a moga bi ka znat,jerbo je ka ono ča se reče ,indirektno na izvoru od informacij,kad eto ti presjednika MO-a Damira Rajčića,iša je najpri u poštu pa san ga zva da posli svrati,a on je onda seja u auto i nako sa desetak metri ja ga pitan,a on kroza otvoreno caklo odgovara,e slušaj,daj reci mi,a on če meni,a čaču ti reč,ako ti neznaš ko zna,ajde pak,ma daj reci mi, ča znaš o “šetnici” ča bi se doli na Sokolanu tribala činit,a on če da je,da če se činit i da su sredstva u buđetu za ovu godinu za oto učinit več predviđena.

I ode on ča,a mi sad između sebe cili u čudu,predviđena sredstva za ovu godinu,godina je pri kraju,oto če se činit,a da niko o tomen u selu ništa nezna,pa ni član MO-a, gori spomenuti Jurlin,nije li to stvarno čudno?

Ali sad kad se je evo napokon i oto doznalo,sad se po selu moredu čut razna, pa pristojno ču napisat,negodovanja,pa se sad opet spominje punpa i lučica,pa se govori da se je dobila za ono doli lokacijska?pa se onda sumlja da nije to radi toga?pa se spominjedu turisti koji je doli zajedno sa našiman krcata plaža,a da jeli se zna ča je to kad se liti sa jahtan,brodican,jedrilican,gliseriman čeka u redu za na punpu utankat gorivo,koje su to masne fleke u moru di se nafta ulije,a liti puše donji vitar i nosiče sve prema plaži,da jeli koko misli na budučnost stanovnika ovega sela,da kako to za da bi se u Sučurac učinila lučica mora doč punpa,a za doli u Stari ča je nikidan pisalo da če se dogodine počet sa izgradnjon-rekonstrukcijon lučice jema pinez,tamo ne triba punpa koja če je financirat?pa onda da kako niko ništa građane našega sela za to ne pita,pa valjda i mi jemamo čako za reč?ko je izabra političare nego mi,a oni moraju činit ono šta je u interesu stanovnikov,očemo referendum… Itd,itd,uglavnon se u selo sad digla okolo toga velika prašina,koju če,naravno,”seoski sateliti” sa razniman svojiman pričan provat slegnit.