Google
4,415

Prikaz događanja od prošle sedmice

Datum:January 28, 2013 10:40 am
Comments
Komentiraj

Domina,Mandina,Filomena, Kate i Marijeta su lokalne lajone šta se obavezno svake nedije popodne nađedu na kafi i protresedu događaje od prošle sedmice,a usput i još čako.

Ma jeste li vidili dežgracije? Govori Gradolačelnik na sjednici ča mu je ovi postavija pitanje da je istina o blokadi računa,a da je problem nasta još od otvorenja Emezete di je spominja niki spisak o nazovimo političkome zapošljavanju na račun kojega se po jednome zaposlenome oslobađalo plačanje komunalnoga doprinosa u vridnosti od 10 000 kun.
Je, je, čula san i ja i još su govorili da je ova nova dvorana dobila pravomočnu uporabnu dozvolu.Fala ti Bože sad če one naše rukometašice ča treniradu po buri, kiši, snigu lipo u teplo bit.Oče Filomena moja oče kako da neče. Eno se več karadu okolo termini ko če i u koju uru u nju moč uč.Čak se čuja i prijedlog da se spominjedu dvi radne dvorane jedna na Sokolanu druga na Goška. Ajde Kate, o tomen se tek govori,a kad če ko zna očemo li mi to doživit.Jo Mandina uvik sve dočekaš na nož. Triba počet,a šta se počne to če se i završit.

Ma vidi ji koliko moredu govorit, ča če nan političari, da je vas dvi meknit sve bi procvitalo.
Dobro ti Domina govoriš, ne moremo mi tu ništa učinit,ali zato mogu govorit. Ne dan jin gušta e.Jeste li vidili oni novi Lidl? Ajme ča je lipo šestan, ma baš je, cili je sladak ka bonbon.
Je, Marijeta je,a ma jesu li mu i cine smišne? A kako kome.
Ma boje, neka dučani šta ji je više boje za nas, konkurencija kalaje cijene.

Jo ča te lipo slušat, još kad bi mi znala reč zašto u ovi zandji deset godin od kako su se počeli veliki dučani u nas otvarat cijene nikako ne kalajedu, nego samo gredu uzgor?
Ajme Domina šta si ti smišna, ne more to naglo, triba proč vrimena.
Marijeta,aj bolje muči da te ne pošaljen ti češ mi o ekonomiji govorit.
Lako ti je kad oni tvoj navigaje, jemate pinez ka gov.n i briga te pošto je ča.
A je vas dvi uvik nađete temu za karat se.
Nisan ja, Domina je prva počela. Dobro je onda ču ja sad mučat.

A jeste čuli, oni sa pilane u Starčevičevoj opet pišedu da jin je više puna kapa rupetin i lokav
kad su u aute ginga ji da pari ka da su na reliju Pariz-Dakar.
A čula san moja Filomena, bidni ljudi, jema več siguri osan godin da o tomen pišedu.
Pusti novi puti su se učinili i asvaltirali, a ovi ča je od kako je i sela ništa.
Vidi ji sad se i u ceste razumite, a onda sigurno znate čako i o rezervarima nafte koji bi tribali na Brižine doč . Eno je Vlada dala suglasnost da ji tamo moredu meknit.
A ča je Kate, počela si se i u naftu razumit? Ne razumin se ja baš puno u naftu nego mi nije drago šta če to baš u Sučurac doč. Milanoviču,Milanoviču.

A šta ti je sad Milanovič kriv,ko o čemu Kate o Milanoviču.
A nego šta ču Filomena moja, ma baš san ga nikidan guštala u Saboru slušat
kad ga je ovi jedan pita jeli mislidu i kad čedu smanjit PDV na spizu oni tvoj Milanovič je
reka da se oto neče dogodit i da taki prijedlog smatra neodgovornin i populističkin ponašanjem. Ma dobro je i reka. Jeli ti to mene zezaš? Ajdete ti i on na ono misto.
A ča je reč? Zato oni tvoj Karamarko ča reče sve je ka Sveto pismo.
Ala,ala smirite se vas dvi. Ma šta ču se smirit ova Kate uvik po bidnome Milanoviču tuče.
Ne tučen ja po njemu nego on mlati po nan. Ajme meni ove dvi, uvik isto.
Ma je li, dače mi sliku ona tvoja Pusička.A kake veze ona sad bidna ima?
Je Domina zato če oni tvoj Lesar čuda učinit. Naravno da oče vidi ga kako lipo govori.

A vidin vidin, naslušala san se ja u ovi dvajstidvi godine lipe govorancije
svi lipo govoridu, a kad dođedu tamo di moredu šta učinit onda ništa.
A ko je bija upetak na noči muzeja? Kvragu ti i muzeji. A šta san sad ja kriva?
Znaš ti dobro. Ne znan, šta to ima loše u kulturnome uzdizanju? Vidi Mandine, ona če meni o kulturnome uzdizanju,a za oni pitos si rekla za šta jin je triba ovoliki pitar?
A kad nije svak pametan ka ti. Ala,ala smirite se vas dvi. Ma vidi ti Marijete ti češ meni govorit o mojoj kulturi više jemaš piture na sebi nego su je potrošili za tunele opiturat.
Gren ča, sad si me najidila. Ajte kvragu obe greni ja doma, a oču ja ostat za sime? A onda gren i ja. A di češ ti Filomena? Oli si zaboravila da ovde stojiš?
A jeste me izludali. Odnija vrag politiku i onega ko je izmislija.

Ispeci pa reci:

2 Comments add one

  1. hopelina says:

    :) ma prave ste:D Oćete li vako svake nedilje?

  2. Parapet says:

    poanta je oko pilane, ka oni pilot uzorak, jerbo ko dobije glase oko pilane, jemat će ih i u gradu… dunkve, asfalt u karijole i valjak u ruke i drito put pilane, tako se vlast osvaja…

Komentiraj

Prethodni post:

Slijedeći post: