Četiri je i deset ujutro,a ona moja me bada da ča ono vanka klapa? A neka klapa,a ča ja sad mogu na ovu buretinu učinit popet se na krov pa da me odnese u Slatine? E, i išla ona kroza portelu povirit ča to klapa.A eno nan je tendu malo izvuklo pa s njon gori doli lamatara,a dobro ajde kad je tenda onda je gren zavidat. I eto mene vanka i sve mi se čini ka da nigdi tamo u velikoj daljini čujen niko zavijanje,a ča je ovo? biče ferata,ma nije ferata konstantno se ponavlja,a pari mi se i ka da ništo vonja.I ulazin ja u kuču vazest rukavice i kapu pa da gren vidit,a pita me ona da di gren?a pari mi se ka da gori pa gren povirit,a ča je, sad te neče u Slatine odnit,a?govori ona,a ča san sad triba reč ?diko je bolje primučat.

I samo ča san zamaka navr kuče vidin plamen i di ču nego put tamo,a kad san doša več je skoro bilo u gašeno jerbo je tot osin naši,Sučurački bilo tot vatrogasac i iz Gomilice,donji kaštili,Vranjica,Žrnovnice i neka se ne najididu ako je još koko bija pa ga ja nisan uspija u šumi gori vidit,ali ji se mora pofalit da su na ono buretine ča je sinoč na minus 5 puvala puno brzo to udunili,jerbo je uz brzo širenje vatre vatrogasciman probleme čininija i led, tako da ka šta mi je ovi jedan priča i voda u brentačaman se smrzavala,a i kasnije je bija problem sa cijeviman kad ji je tribalo skupit jer ji je počelo ledit (reka je jedan danas u selo da su kockice leda kroz šmrk izlazile).Negoo, požar je bija tamo nigdi sa južne bande Gorice,navr onega dučana šta prodaje Volvo aute,ali sa sjeverne bande o Magistrale. Kako je počeja? a neslužbeno se govori da jema bit kako je to zbog niki žic od struje? A istraga če pokazat šta je stvarno bilo. Inače su zbog predostrožnosti iz obližnje kuče evakuirani ljudi koji su vrlo brzo vračeni jer su vatrogasci to vrlo brzo i kvalitetno sanirali,a posli obavljenoga posla morali i ostat čuvat da se na ovu buretinu požar opet nebi aktivira.

Ova večer je pokazala da postoji problem u kvalitetnomen uzbunjivanju stanovnika jer osin one sirene na vatrogasnomen domu jema još i sirena na zgradi od opčine koja ne radi,a jema bit da i sirena na onoj zgradi nasuprot Konzuma isto tako nije u funkciji,jer dobro sad da ja sinoč nisan čuja jerbo je bura biče zvuk do Štafiliča nosila,ma mi nije jasno kako ovi jedan ča mi danas govori isto tako nije čuja,a tamo kraj Bonbardeli stoji?

A zašto se onda svaku prvu subotu u misecu provajedu sirene?

Ovo ča su mutne slike nije do mene nego do vitra,a inače nočne slike se radidu tako da aparat triba meknit na stalak,a ja san to slikava onako, s nog uz veliku podršku bure.