Tamo di su prostorije o glazbe meklo je znak da je zabranjeno parkiranje i zaustavljanje sa dodatnin natpison “vatrogasni pristup”. E sad, odma jutros se nji par uvatilo komentirat da di se sad ovod nesmi parkirat?jer ka ča se zna po propisiman se nesmi parkirat iza ovakoga znaka,a to znači da se aute ka i do sad tote moredu parkirat?,a ovi drugi govori da biče to pošto je ovi iks doli nacrtan nesmi se tot na njemu parkirat da auta more prema tamo doč?,a onda ovi treči govori dobro,tot se nesmiš parkirat,a dokle se onda ovi sa straan,naravno ako se moredu parkirat, smidu parkirat? tribalo bi sad potegnit crte dokle je krajnja granica dokle se auta more parkirat s jednu i drugu bandu od otega iksa jerbo svako more reč,a kad san ja autu ostavija onda je bilo mista za proč,a oni je doša iza mene i učinija da je sad tisno pa se zato ne more proč,a ovi četvrti govori,a kako vi znate da kad dođe stani pani koko neče objasnit da ovi znak znači da se niko na ovemu trgiču ne more parkirat?
Bilo kako bilo,ali to se razvilo u jednu veliku diskusiju u kojoj su padale varijante ča ji još nikad do sad nisan čuja,a i bolje da ji ne pišen jerbo ču još ja ko zna kakvi ispast.