A zabavno li je u ovemu našemu selu,svaki dan ništo novo.
Evo danas se opet skupilo svita za vidit ča se to novo na pazaru događa,a dogodilo se to da kako su armavali stope za buduče banke od peškarije u odnosu na projekat koji je prije nego ča se Pazar počeja činit ljudiman ča tote stojidu bija pridočen, to sad sasvin nika druga priča.

Pa je tako na tomen projektu u odnosu na stope ča su ji danas armavali, banak peškarije od kuče udaljen i cili pedesetak centimetri više nego ča je to sad,po projektu okolo metar i dvadeset,a sad je nigdi okolo sedandesetak centimetri,a isto tako sa bankon se išlo doli prema jugu,tako da postoji mogučnost kad čovik bude otvarat ponistru da koga bugne po glavi,pa je zbog novonastale situacije vlasnik od kuče zva upravitelja Vlastitoga pogona Ivana Čaglja koji mu je reka da se od projekta odstupilo radi pronalaska iskopin ,a da bi sad opet tribalo vidit sa konzervatoriman je li se to more kako drugčije izvest?

I sad, kako je tote popodne bilo dosta svita tako se i puno toga moglo čut,pa je jedan reka da se sad po oviman naliveniman stopan vidi da je ona murva smetala ,a čulo se i to da zašto se u Staromen pri dvi godine kad se činija novi pazar napravija sa mobilniman banciman i tako se dobija lipi prostor i da zašto se to nebi i ovde učinilo,lipo ujutro po potribi če se meknit banci,a kasnije kad sa pazaron bude gotovo banci če se spremit,jema fala bogu mista,tamo di je bilo„U Slavića“ili ovde na rivi di je bija Turistički,zašto to u Staromen more,a u Sučurcu ne more? I za divno čudo,svi prisutni, okolo ove ideje su se složili.Fala in.Ne triba nama nikakvi posebni tretman.

Eto na,pogotovo sad kad se zbog novonastale situacije,radi iskopin moradu činit razne makakade,zašto se nebi razmislilo o napuštanju ovega projekta i išlo prema ideji o mobilniman banciman,a pineze ča su se mislili ovde potrošit kanalizirat za učinit jedno lipo dičje igralište?