A ča jema da je poplavilo i evo ga sad opet

Datum:December 24, 2019 5:14 am
Komentari
Komentiraj

Zanji put je bilo to sredinon jedanajestoga miseca kad je isto tako ljudiman u kuče more ulazilo,asti,a jesan li ja smija ovako to napisat,jerbo je gradonačelnik reka da če me za sljedeču napisanu laž tužit,a kad smo mi iz MO zanji put kod njega tamo 25.11. bili onda san na temu od poplavljivanja reka da kako ljudiman nisu navrime vriče sa savuron došle,a da jesu,možda bi tragedija bila puno manja,pa mi je Čagalj reka da nije to baš bilo tako,da su navrime došle,a još je spominja i to da su ljudiman neki podrumi poplavili,ma koji podrumi govorin ja,ljudiman je u kuče ulazilo,tako da i ovo sad ča opet pišen da je i ovi put ljudiman u kuče more ulazilo je po njiman još jedna od moji laži,manipulacij,obman i ča ja znan čega još,a ljudi ča jin je poplavilo neka se češedu,a projekti (upss ni ovo projekti nisan smija napisat,jerbo je gradonačelnik i zbog ovoga na me skočija,da koji to projekti,da di su mi ti projekti, ja opet manipuliran…,ali o tomen ču drugi put) ča su za selo rađeni, neka skupljadu prašinu,a oni političari iz sela ča su ljudiman obečavali da kad ji izaberedu kako čedu jin problem naplavljivanja riješit,a nisu,su sad nakon visoki vunkcij u opčini sebe do penzije na lipe plače smistili,a ti narode trpi i muči.

Pa san onda na tomen sastanku pita da kako to kad su poplave na terenu nima oni iz civilne zaštite,da bi mi dogradonačelnica Matok Bosančić koja je na čelu Kaštelanske civilne zaštite na to rekla,da je civilna zaštita samo koordinator između razni službi za date momente,a onda to nije ka pri,kad se u svako selo znalo ko je u otoj civilnoj zaštiti i ča u datomen momentu triba radit,pitan ja,a da nije,eto tako da više ne pitate, di su nan ljudi iz civilne zaštite za pomoč,a kad več govorin o toj civilnoj zaštiti onda triba spomenit i to ča nan je priča ovi jedan dokle je Mislav šahtu čistija, da mu je žena zvala vatrogasce,a oni su joj rekli da dokle se more ne povuče ništa ne moredu učinit,a za ostalo neka se javidu civilnoj zaštiti i govori čovik da mu je žena zvala ko zna koliko puti,ali se na oti broj niko nije javlja,pa onda npr.več od podne je more poplavilo dijal ceste od Rive prema Mulu,a tek tamo okolo biče četiri manje dvadeset popodne su ovi iz gradske službe mekli znak da se tamo ne prolazi,a policija je došla okolo tri i deset-petnajst i blokirala cestu auton dok ovi sa znakovima nisu došli…

A ljudiman je više puna kapa i politički pripucavanji i politički manipulacij i predizborni laži i pusti obečanji i slikavanja i snimanja njiove nesriče,kako mi je ovi jedan reka,a da ča više slikajen,koliko več jema vrimena da o ovomen pišen, koliko san do sad slik učinija,koliko je do sad televizij bilo,pa nikakvoga pomaka,nikakve koristi od toga,a i da ča mi u Mjesnomen Odboru činimo,samo se bezveze nalazimo,ništa ne rješajemo,da ča smo se uvatili toga kad ne mislimo radit i da neka se sramimo i stidimo i da smo svi isti koliko nas ko jema,briga nas za male ljude…(a ja san ka veliki ?)
Brate opralo me,a i neka je,dobro su i rekli,a ča je najgore od svega,jemadu prav!

Utrka kajaka Sučurac 2019

Datum:December 22, 2019
IMG_0050

I kad je najteže ljudi udredu brigu na veselje:    

Otvori ...

Sučeljavanje predsjednički kandidati

Datum:December 20, 2019
855

Utorak uvečer je,spremija san kokice,pičence,sve san smistija na dohvat ( e nisan vrčinu) i nestrpljivo čeka kad če počet sučeljavanje jedanaestoro presjednički kandidati,je mi ka nije drago da če ji bit svi jedanajst,bilo bi ka bolje da ji je samo nji par,izgledalo bi to onda nikako žustrije,napetije,žešče,bilo bi karanja…,ali opet sa druge bande dobro je da svi jemadu isti tretman,jer jema oni ča nimadu puno pinez pa se nisu uspili…

Otvori ...

Ode još jedna palma

Datum:December 20, 2019
IMG_9711

I druga palma isprid zgrade na Gospici je stradala od one zločeste palmine pipe,pa su tako nikidan došli iz Parkov i nasadi otpilali je i odnili ča,a ja san taman trevija kako je Vili sanira prostor di je pala,pa je podiza travu i nasipa ispod zemlju da poravna udubine. E Vili,eto opet posla,a,opet repriza od prošlega puta,cipanje i komadanje ostatka debla ča je osta u zemlji,a nije,smije se i govori…

Otvori ...

Asti ča je lipo bit nezavisan,moreš poč di očeš i ne tribaš se mislit smiš li

Datum:December 18, 2019
IMG_9301

Pa san tako u subotu moga slobodno poč do Poljuda vidit kako če to bit na Škorinomen predizbornomen skupu,nisan ka ovi jedan ča san ga sinja,slučajno tote,kako mi je reka, prolazija,več san tote namjerno doša,ka jema san i ja izliku da san malomen doša sa preplaton od Sjevera da mi dadu kartu za Istok,ma mi to ne triba,ka ovemu ča mi je reka da je on slučajno tote prolazija,pa ka…

Otvori ...

Nezaposleni i penzioneri ova tri dana moredu dignit bonove

Datum:December 16, 2019
004aa

U zgradu stare anbulante-sada Mjesnoga odbora, ponediljak,utorak i sridu  Grad če penzioneriman iz Sučurca i Gomilice dilit Božičnice u vidu poklon bonov,dok če nezaposleni ove iste dane božičnicu moč dignit na ulazu sporske dvorane na Sokolani.Vrime podjele je od osan uri ujutro,do dvi ure popodne.

Otvori ...

Na stari kanpanel je napokon meklo mriže

Datum:December 14, 2019
IMG_9459

Jučera su na staromen kanpanelu na dva otvora prominili razbivenu mrižu, pa tako golubi unutra više ne moredu ulazit. Radila je ista ekipa koja je postavljala i rasvjetu,a pošto kanpanejal zanji dva tri dana nije svitlija onda su jin doli na Rivu rekli,da je li znadu,a da jin nije niko reka,a eto sad znate i kanpanel je sinoč opet prosvitlija.

Otvori ...

Sveta Lucija

Datum:December 14, 2019
128

Puno nji i nezna za ovu malu crkvicu o Svete Lucije,ali ti ne dadu gušta pa onda kroz razgovor očedu ispipat za doznat. A ka da je teško lipo reč neznan i gotovo. Crkvica je to,ustvari kripta, šta se nalazi točno ispod katedrale o Svetoga Duje,a do nje se dolazi sa južne bande katedrale pa se sađe niza skale i sa jednin uskin hodnikon dođe do crkvice u kojoj se…

Otvori ...

Triba ovo sredit da koga ne plesne struja

Datum:December 12, 2019
IMG_9240

Opet je u Vriliman na razvodnoj kutiji od struje za rasvjetu ča se nalazi na zidu od podvožnjaka niko razvrnija prednji dijal, pa postoji mogučnost da koje radoznalo dite badne rukon.Zanimljivo je kako je ovo ko zna koji put do sad da su odvrnili ovi prednji dijal koji se u nedostatku originalnoga poklopca mekne od late,a bilo je govora da če se prominit cila ota nova kutija, tako da bi…

Otvori ...