Turnir u malomen balunu na Sokolani
Prošli petak je počeja turnir u malomen balunu na rukometnomen igralištu na Sokolani,a naravno,to u selo nije prošlo bez da se sitilo kako je sredinon osandeseti godin Sučurački turnir bija jedan od oni u vrju bivše države,a u naše selo dolazili su sa svi stran,ali ko če se svi sitit,evo ono ča meni pada napamet su npr. ekipe,Mostarske kiše,Miki maus,Zagrebačka uspinjača…,su ekipe koje su bile u samomoen vrju malega baluna,a mi se puvali kako bi ovo naše malo misto u to misec daan koliko bi se turnir održava,postalo veliko,svi su o tomen turniru pričali,novine pisale,radijo govorija…,ok,bilo je i kasnije pokušaji,nigdi 2010 g.duralo je dvi godine,niko govori da je bija još niki pokušaj,pa evo sad i ovi,a svi se nadaju kako bi ovi moga jemat uspjeha i da se neče nakon dvi sezone i on udunit…
Ali,vratimo se mi malo na ono turnira u osandesetiman zbog kojega je Sučurac bija nezaobilazna litnja destinacija,a uz ove velike ča san ji gori spomenija,a bilo ji je još,ali ji ja neznan nabrojit,bilo je puno ekip iz našega sela,kenda se balun na svakomen kantunu,a skoro pa svaka ulica jemala je svoju ekipu za na turnir poč igrat,a pa smo tako jedan put,a bilo je to prvi put osandeset i pete godine,Filko i ja došli na ideju da ča i mi nebi jednu ekipu učinili,naravno iz zajebancije,jer ča se baluna tiče i on i ja jemamo dvi live noge,e,pa je onda bilo,kako bi se mogli zvat,a jedino logično ime je bilo Ravni tabani,naravno,po mojiman ravniman tabaniman,a onda smo išli skupljat ekipu i ča je najgore od svega,jemali smo puno lipu ekipu,tri dila ji je igralo u Jadrana ili je bilo igralo,napravili smo šablonu i sa sprejen po majicaman učinili natpise,RAVNI TABANI,a ja san jema dres sa nacrtanin tabanon,a zva san se Tabanijo,a ka ča čete vidit na jednoj slici,jemali smo mi i veliki taban,učinjen od stiropola,kojega bi pri utaknice poklonili suparničkoj ekipi.
E i to ti je bija šou od utaknice,na svaki početak,Filko i ja bi bili u početnomen sastavu,svaki na svoju stranu,on livi bek na desnoj,a ja desni bek na livoj bandi terena,a pa bi ili on doda balun meni ili ja njemu,pa se tako sičan jedan put,neznan kako su se zvali,ali su dobro kotirali,počeli Filko i ja sa dodavanjen,a ovi iz suprotne ekipe govori,majko moja koji su ovo redikuli,samo čemo prič priko nji,ali naravno,nas dva bi nakon prve minute izašli vanka,a ostali bi igrat oni pravi,a pa se tako dogodilo da su upravo ovi ča su nan se rugali,oti put od nas izgubili,a tribine koje su bile krcate su se tresle od euforije…
Eto,mora san ovo radi Filka napisat,jerbo znadu oni šta imadu Fejs,kako bi on svako malo meča sliku od Ravni tabani,a pa bi sigurno i sad čako napisa,ali eto,On na žalost više ne more,a pa san evo ja spomenija.
Danas su svi upirali prston put neba
A ono je bilo išpartano sa dosad neviđenin brojen bili rigi šta su ostajale ka trag od avijoni,a o timan tragoviman ili kako se još nazivadu chemtrailsi su napisane puste litanije,a dosta oti priči se svrstavadu u teorije zavjere,a šta je istina,je li to trag zbog vodene pare iz avijona i tenperature zraka koja na desetak iljad metri zna bit i do minus četrdeset ili je to ništo drugo ča…
Otvori ...Kanpanel nan je zapušten,po njemu restedu razno razne biljke…
Ma to ste Vi u glavi stvorili krivu percepciju,meni znadu reč kako sve gledan crno,rođeni pesimista,dok je u drugi čaša napola puna u mene je obratno,napolak prazna,ali vidin ja da jema puno pesimističniji od mene,evo npr.ovo bidnega starega kanpanela u našemu selu pokrivenoga raznoraznin raslinjen,ja uopče ne gledan ka da je On zapušten,sad če koko reč,a ča mu je oli je poludija,a ne,obalazeči bjelosvjeske destinacije u svojoj glavi san stvorija…
Otvori ...Zove me jedan u subotu okolo šest ipo ujutro na mobitel
Da je li spavan,nije,čekan tebe kad češ me zvat,da ča se odma jidin,ma ne jidin se,moliboga da san se mora rano dignit jerbo da si me probudija, bija bi te lipo posla,ča je,ča zoveš,a da je li ja vidin iz pravca kave onu prašinu,a evo me u selo,pa ču sa Sokolane poč vidit,ajme nan,nastavija je ovi,a ča nan je ajme,a je li ovo kako puše burin diže ono šljake-troske ča…
Otvori ...Parti Moto kluba Uspomena
Se upravo događa na Sokolani di proslavljadu svoj trideset i prvi rođendan,na kojemu ji sa pozornice koja se,po običaju, nalazi u košu od kamijona,zabavlja grupa Teška odluka,a za spizu jemadu fažol,tripice… Zanimljivo je kako jin je nakon dugo,duugo godin,napokon potrefilo lipo vrime,inače je u večini slučajev bila kiša,ustvari lažen,bila bi i kiša sa buron…
Otvori ...Da ča su ona vrata sa istočne bande od anbulante mekli?
Jema več nikoliko daan od kako je meklo ova vrata, da se po selu raspravlja,a niko nima ništa lipo za reč i svi su složni,(šta je vrlo čudno) u jednomen,da ka puno mista jema za auto okolo anbulante meknit i zamisto da činidu nova mista,oni su napravili ovo? Znači vako,ota vrata su mekli zato da oni ča radidu u anbulanti jemadu di aute parkirat,je li to moredu napravit?A sigurno moredu,jerbo…
Otvori ...Od danas morete itat glomazni otpad u one velike kontejnere
Kontejneri su ka i lani doli na Rivu ispod crikve i kraj nji stoji radnik iz Zelenoga i Modroga da nebi itnili i ono šta se ne more itat. Inače,ovo kontejneri je meklo u sklopu akcije Lipa su lipa moja Kaštila,a itat morete sve do subote i subotu i to od osan uri ujutro,pa do podne.
Otvori ...Svaki nikoliko godin se ponavlja ista priča
Di nas strašidu sa nasloviman kako Prometovi autobusi nečedu stajat u Kaštila,ovi put su uz Kaštila i Omiš,Trogir,Solin…,a baš san danas upa u priču i govorin ja oviman s kojiman san priča kako je i prije bilo slični situacij kad nan se pritilo da autobusi u Kaštila nečedu vozit,da kad je to bilo,ja sanjajen,ništo san pobrka,oni se sičadu pri nikoliko godin da je to bilo sa Dugin Raton di nije…
Otvori ...Prelet Rafaleia priko Kaštili danas u deset uri i osamnajst minuti
Rafalei su letili priko cile Hrvatske i na oti način obilježili 29 godišnjicu operacije Bljesak u kojoj je oslobođena zapadna Slavonija…
Otvori ...
Komentiraj