Ča mi je sad?a ništa,nikidan tamo na cestu di su počeli sa radoviman sa strane ceste mekli su tabelu,znate ono,ko radi,šta radi,di radi…e i tamo di piše okle dokle če se ova dionica radit,piše da se oto radi od Mrtvenica-Gospinica,poddionica Gospinica-Dom zdravlja u Kaštel Sučurcu???
Kad san ovo pročita odma san u ruke vazeja onu knjigu o našega sela (monografiju) i nima koga u selo od stariji ča su ostali,a i oni sridnji godin ča se tendidu, nisan pita jeli koko zna da se Gospica možda prije zvala Gospinica? svi su se čudili,a jema i oni ča su pljucali i usput spominjali da se u nas kako komen pada napamet izokričedu nazivi koje ljudi od pamtivijeka ovde u nas koristidu,pa je tako nikomen palo napamet Glavicu prozvat Kula top,Gospojsku štradu nazivljedu Podvorje, iako podvorje imenično označava područje van biskupskih dvora i sad je evo došlo do novoga nesporazuma u lokalitetnoj identifikaciji di je Gospicu prikrstilo u Gospinicu.Nevjerovatno!
A ma jeli oti ča se igradu sa minjanjiman imen od razni lokaliteti znadu da toponimi,trigonometrije,povijesne lokacije, objekti,nazivi zemljišnih posjeda,osim šta su službeni identifikatori,oni su ujedno zbog samoga nastanka i dijal povijesne i kulturne baštine sela,zajednice ili naroda u cjelini,a njijovo iskrivljavanje,bilo ono svjesno ili zbog neznanja je svojevrsno brisanje ili pak promjena mentalnoga i identifikacijskoga nasljeđa u narodu.
Pa se onda vratimo malo u prošlost,pri jednu 210 godin kad je maršal Marmonat (čitaj Marmont) izdrica Kaštelansku cestu koja je išla uz more,a u selo je išla od našega Đardina, prolazila kraj starega kina,kroza Varoš,pa onda prema Gomilici di je prolazila uza Kaštilac… i tako uz more sve do Novoga.
Onda je poslin toga prisika i prostor na Zgonu nakon čega su naši stari na tomen novomen križanju priko kojega se iz sela odilo na Velu Gospu, tamo nigdi u devetnajestomen stolječu u kamenu učinili malo spomen svetište sa Gospinom slikon kad je ona bila cesarica,ča oče reč,mlada divojka ili ti ga u deminutivu,od Gospe-Gospica.
E i odonda su naši stari otu lokaciju kolokvijalno prozvali Gospica i zato oto misto nikako ne more bit Gospinica.
Ovo radi oni,ča se očedu činit tradicionalisti,pametni,oliti ga čudoredni,neka posluži ka poučak da svi zajedno jemamo obavezu i kroz ove nazive čuvat,ne samo memoriju ovega sela,nego i identitet cilega Hrvaskoga naroda. Sigurno čitate i slušate ča govoridu naši demografi i vlast,da nan priti nestanak ka naroda! I zbog buduči pokoljenji koji iza nas dolazidu stvari triba nazivat pravin imenon. Znači, od kako su naši stari na to misto mekli oto malo spomen svetište sa slikon mlade Gospe,oti dijal okolo njega se zove GOSPICA!!!!
A ča je sad Filko an ?Nastavljamo sa lažiman ka i u Mašogaduru an?Dobija si zadatak an?
Znan da je tebi to nezamislivo, ali ostalo mi je još malo mozga da mogu i svojon glavon mislit 😛
Pa nisan ti reka da si Slovenac ako pišeš “Sučurac” … kad i na tablan prema selu tako piše … ili je i to neka teorija zavjere!
Sve ča si gori napisa stoji ali Glavica nikako ne more bit “Kula Top” … Eto tako!
I di je nesta “Trg Pavla Marušića” … kad si već sve nabrojija gori u postu?
Di je nesta Trg Pavla Marušića? A evo od kako san to tvoje pitanje pročita gledan u kristalnu balotu i ništa mi ne “govori” ,a pošto si ti doli na toku,pa pitaj koga,sigurno češ dobit valjano objašnjenje.
Nego si ti mene sad odveja na drugo misto,sad bi ti priskaka,najprije mi odgovori zašto si napisa da ja nisan pisa oba tomen kako su od Glavice učinili kulu top?
Evo ti na Filko,oliti ga @umorno_joko moje kad san ja odo tome pisa:
“Zašto je top na Glavici posta kula top?
Postavio:admin Datum:June 17, 2014 1:51 pm
Da kako san ono nikidan kad se je otvarala izložba napisa da je to bilo u topu na Glavici. Kako san ja napisa?a lipo san napisa, a kako je niko moga napisat ka ča je to zanji put za niku izložbu slik bilo,a prije nji i drugi da če oto bit u kuli top? Čekaj malo kula top? A po tome ispada ota cila građevina jedan veliki top? asti,a onda je oti top bija največi na svitu,veči od one Debele Berte ča se je nikoliko stotin godin kasnije koristija u I Svjeskomen ratu?
Dodro, ajde,dosta zafrkancije. Znači oni prostor se ne zove kula top,nego se oto misto-područje zove Glavica,a ono je top na Glavici.Tako da za ubuduče oni ča neznaju sada znadu.”
A sad mi reci kako nisan ništa pisa oba tomen kako se uporno oče Gospojsku štradu preimenovat u Podvorje. Ajde,ajde, jedva čekan. 😀
Ma svaka ti je na mistu!
Onda nan nima ništa drugo nego učinit denmonštrancjun najpri na GOSPICI pa se skalat doli do GLAVICE, pa kad pukne TOP, ako ko bude od voje, more poć i na TRG PAVLA MARUŠIĆA.
Amen!
Ma gle ovu dvojicu,šta bi tek bilo da nisu kumovi?
Bravo umorni.Poza toga bi zbog svega navedenoga mogli napravit prosvjedni marš Kaštelanskom cestom,samo je najprije tribamo nač kamo je nestala?
I sta sad?
Oce li nam ko objasnit zasto je i ko je gospicu prozva gospinica?
Ipak je ovo napisano sluzbeno.
oce objasnice ti isto ka sta su i do sada objasnjavali
Sramota
Da-li je onda dokument pravovaljan,jer u označavanju dionice i poddionice nije točno napisano ime lokacije?