Jutros taman da ču fičon doli prema Gospici kad me jedan fermaje,ma jesi li vidija di su doli na rivu na travu cijevi mekli? A nisan. Poj vidit. A gren. I doša ja doli na rivu,a glavna preokupacija oni ča san ji doli naša je bila priča o cijeviman i da je li ko od oni ča tribadu oto vidija i da kako jin se nije reklo da ji stavidu na drugo misto,npr.doli di su šentade jema mista koliko očedu. I taman se razvila priča ča bi i kako bi tribalo kad viče jedan,vidi,vidi slikaj ono vidi kako bageron prolazi priko trave,a doli su ukopane cijevi i prskalice za zalivanje i dokle san ja doša za oto slikat bagerčič je taman saša sa trave (vidite na slici),ali su zato ostali tragovi di je proša (vidite na slici).
E sad je opet počela rasprava da di je moga proč nego tot?a moga je tretoaron,a smeta mu skala,a ča nisu mekli koji cok i kašjun pa tako napravili ranpu ili ako je več mora priko trave mogli su bili koju puntiželu meknit,a ne vako ruvinavat itd.itd bilo je tot i beštimlji i …