A popravljadu ono šta su falili.
Znamo svi da je pri radov kad bi padala kiša tote ležala voda i to su bile samo dvi veče šahte u kraju di su odili pješaci,a asvalt nije jema nikakvi pad,a posli završeni radov je osvanilo deset šahti i cili asvalat je dobija nagib prema sjeveru da bi voda išla prema šahtan i dogodilo se ovo:

I evo,jučera je došla ekipa i počela strugat asvalat za da bi se učinija pad prema šahtan,a ča če posli ovega bit vidičemo,neču davat nikakve prognoze i tako mi več govoridu da san Nostradamus,a i kad su ovi radovi bili gotovi iznija san sumnju da je to učinjeno kako triba.
A ča ču,nisan ja bidan kriv ča se bez ikaki instrumenat, golin okon moglo vidit ča če se na kišu dogodit.

I kad su več ovde bilo bi dobro da spustidu oni donji korniž na zebri ča gre prema anbulanti,pa da se more normalno sa koliciman prolazit,a i stariji odit,jerbo jin nije lako noge dizat.

Ima i jedna priča,kad su uputili ove privremene semafore u rad,dogodilo se da je ovi kraj autobusne stanice svitlija crveno i zeleno od bote i zoven ja ovega ča ga je meka i iša ča dalje, da semafor svitli crveno i zeleno,a on me pogleda ka ono,ma vidi ovega ča me zajebaje,a ma je, govorin mu, i doša ti ovi,a taman kad je tote bija svitlo se prominilo i posli žutoga pribacilo na crveno i sad on mene gleda,a ja se ka opravdajen i da če poč ča,a ja mu govorin ostani malo,kad bude pribacat i eto ga,opet isto,kad je tribalo pribacit na zeleno,opet su svitlile i crvena i zelena,a šta san ti ja reka, on gleda u čudu,otvara elektroniku,zafalije mi se,usput nika žena iz aute viče,a je li ja sad moran stat ili krenit,a ja umiren od smija,smij se ti smij,da njoj uopče nije do smija jerbo je ona prva u koloni,ovi nije zna ča če,pa su kasnije zamisto ovega donili novi semafor…

Evo ovde triba spustit ove cokule za da stariji ne bi zapinjali i da bi kolica mogla normalno prolazit: